لیبیا میں سیاسی عمل کے لیے نقصان دہ اقدامات سے اجتناب پر اصرار

یو این جمعرات 1 مئی 2025 01:45

اسلام آباد (اُردو پوائنٹ ۔ UN اردو۔ 01 مئی 2025ء) لیبیا کے لیے اقوام متحدہ کے معاون مشن (یو این ایس ایم آئی ایل) نے ملک میں حالیہ سیاسی واقعات اور سلامتی کی صورتحال پر تشویش کا اظہار کرتے ہوئے کہا ہے کہ سیاسی رہنماؤں اور عسکری حکام کی جانب سے لیے گئے یکطرفہ اقدامات کے سنگین نتائج ہو سکتے ہیں۔

مشن نے ملک کے سیاست دانوں اور عسکری حکام سے کہا ہے کہ وہ ایسے اقدامات سے گریز کریں جن سے سیاسی مشاورتی عمل کو نقصان پہنچے اور امن و استحکام کمزور پڑنے کا اندیشہ ہو جو کہ پہلے ہی بہت نازک ہے۔

(جاری ہے)

لیبیا میں رہنماؤں کے یکطرفہ فیصلوں سے واحد متفقہ جمہوری حکومت کے قیام کے لیے جاری کمزور سیاسی عمل کو خطرات لاحق ہیں۔ اگر یہ رجحان جاری رہا تو ریاستی اداروں میں تقسیم مزید بڑھ جانے کا اندیشہ ہے۔

مشن نے تمام سیاسی رہنماؤں اور عسکری حکام سے کہا ہے کہ وہ ایسی تعمیری مشاورت کے لیے سازگار حالات پیدا کریں جس سے متفقہ سیاسی طریقہ کار تشکیل دیا جا سکے جو ملک کو مشمولہ اور قابل بھروسہ انتخابات کی جانب لے جائے۔

معاون مشن کا کہنا ہے کہ ایک نمائندہ حکومت اور متحدہ، مستحکم اور خوشحال ملک کے لیے لیبیا کے لوگوں کی امنگوں کو پورا کرنے کے لیے ایسا کرنا بہت ضروری ہے۔