نیدرلینڈز کے سفیر ہینی فوکل اور ہاکی اولمپئن بوولینڈر کا پنجاب یونیورسٹی کا دورہ

جمعہ 2 مئی 2025 23:30

لاہور (اُردو پوائنٹ اخبارتازہ ترین - اے پی پی۔ 02 مئی2025ء) ڈچ سفیر ہینی فوکل اور نیدر لینڈز (ہالینڈ) کے ہاکی اولمپئن بوولینڈر نے پنجاب یونیورسٹی شعبہ سپورٹس کا دورہ کیا اور ڈائریکٹر ڈاکٹر محمد شبیر سرور سے ملاقات کی۔اس موقع پر پرائم منسٹر یوتھ پروگرام کے خواجہ جنید، رضوان انور، فٹ بالر کائنات و دیگر نے شرکت کی۔تقریب میں نامور ڈچ کھلاڑی کے اعزاز میں ہاکی، فٹ بال اور باسکٹ بال کے میچ ہوئے،جس میں بوولینڈر نے میچ کھیلتے ہوئے کھلاڑیوں کو ہاکی کے دائو پیچ بھی سکھائے۔

(جاری ہے)

اپنے خطاب میں ڈچ سفیر ہینی فوکل نے پنجاب یونیورسٹی میں خواتین کھلاڑیوں کی کارکردگی کو قابل تحسین قرار دیا۔ہاکی اولمپیئن بوولینڈر نے کہا کہ1990 لاہورمیں ہونے والے ہاکی کے فائنل میں انہوں نے دو گول کئے تھے اور آج کئی برس بعد لاہور آکر بہت اچھا لگا۔انہوں نے پنجاب یونیورسٹی اور پرائم منسٹر یوتھ پروگرام کا شکریہ ادا کیا۔ڈائریکٹر سپورٹس ڈاکٹر شبیر سرور نے کہا کہ وائس چانسلر ڈاکٹر محمد علی کے ویژن کے مطابق پنجاب یونیورسٹی میں کھیلوں کو فروغ دینے کیلئے کوشاں ہیں۔ڈائریکٹر سپورٹس کی دعوت پر ڈچ سفیر اور ہاکی اولمپئن نے پنجاب یونیورسٹی دوبارہ آنے کا وعدہ کیا۔