Live Updates

پہلگام واقعہ: بھارتی بابر اعظم کی پاک فوج پر تنقید سے متعلق جعلی پوسٹ شیئر کرنے لگے

اپنی سکیورٹی ناکامی کو چُھپانے، پاکستان پر الزام تراشی کے بعد بیانات سے بچنے کیلئے بھارت نے رضوان اور بابر کے انسٹا گرام اکاؤنٹس بھی بلاک کردیے

ذیشان مہتاب ہفتہ 3 مئی 2025 13:38

پہلگام واقعہ: بھارتی بابر اعظم کی پاک فوج پر تنقید سے متعلق جعلی پوسٹ ..

لاہور (اردو پوائنٹ تازہ ترین اخبار ۔ 3 مئی 2025ء ) پہلگام واقعہ کے بعد جہاں انتہا پسند بھارتی حکومت پاکستانی کھلاڑیوں کے سوشل میڈیا اکاؤنٹس بلاک کررہی ہے وہیں جھوٹا پروپیگنڈا بھی پھیلا رہی ہے تاکہ پاکستانیوں کا مورال پست کیا جاسکے۔

اپنی سکیورٹی ناکامی کو چُھپانے اور پاکستان پر الزام تراشی کے بعد بیانات سے بچنے کیلئے بھارت نے گزشتہ روز قومی ٹیم کے کپتان محمد رضوان اور اسٹار بیٹر بابر اعظم کے انسٹا گرام اکاؤنٹس بھی بلاک کردیے تھے۔

تاہم اس کے محض کچھ گھنٹوں بعد پاکستان کے اسٹار بلے باز بابر اعظم کی جھوٹی انسٹاگرام اسٹوری کی جعلی تصاویر گردش کرنے لگیں جس میں پہلگام واقعہ پر پاک فوج کی مذمت کی گئی تھی۔

اس جعلی پوسٹ میں مزید کہا گیا تھا کہ پہلگام واقعہ میں پاکستانی فوج کا کردار نامناسب ہے، میں بطور کرکٹر ہندوستان میں کھیلنا پسند کرتا ہوں اور اُسے دوسرا گھر سمجھتا ہوں، یہ بدقسمتی کی بات ہے کہ بھارت میں میرا انسٹاگرام اکاؤنٹ بلاک کردیا گیا تھا، میں یہ بالکل واضح کرنا چاہتا ہوں کہ پہلگام حملے میں کرکٹرز ملوث نہیں‘۔

(جاری ہے)

بابر اعظم کے نام یہ جعلی انسٹاگرام پوسٹ تیزی سے وائرل ہوئی جس کے اسکرین شارٹس کئی میڈیا اکاؤنٹس نے بھی شیئر کیے تاہم یہ خبر جھوٹی نکلی۔ بھارت سوشل میڈیا اور مغربی میڈیا کیساتھ پاکستانیوں کے حوصلے پست کرنے کی کوشش کررہا ہے۔

قبل ازیں بھارت نے سابق کپتان راشد لطیف، شاہد آفریدی، اسپیڈ اسٹار شعیب اختر اور باسط علی کے یوٹیوب چینلز پر پابندی عائد کی تھی جبکہ وسیم اکرم، شان مسعود، حسن علی، نسیم شاہ، امام الحق اور شاداب خان کے انسٹاگرام پیج تک رسائی بھی ناممکن بنادی گئی ہے۔