معروف عالم دین اور سربراہ جمعیت اہل حدیث سینیٹر پروفیسر ساجد میر انتقال کر گئے

انتقال کی خبر سے ملک بھر میں دینی، سیاسی اور علمی حلقوں میں گہرے دکھ اور افسوس کی لہر دوڑ گئی علامہ ساجد میر کی سیاسی، مذہبی اور سماجی خدمات ناقابل فراموش ہیں، چیئرمین و ڈپٹی چیئر مین سینٹ

ہفتہ 3 مئی 2025 17:01

معروف عالم دین اور سربراہ جمعیت اہل حدیث سینیٹر پروفیسر ساجد میر انتقال ..

اسلام آباد(اُردو پوائنٹ اخبارتازہ ترین - این این آئی۔ 03 مئی2025ء)ملک کے معروف دینی و سیاسی رہنما، جمعیت اہل حدیث کے سربراہ سینیٹر پروفیسر ساجد میر انتقال کر گئے۔ ان کے انتقال کی خبر سے ملک بھر میں دینی، سیاسی اور علمی حلقوں میں گہرے دکھ اور افسوس کی لہر دوڑ گئی ہے۔اپنے بیان میں چیئرمین سینیٹ سید یوسف رضا گیلانی نے ان کے انتقال پر گہرے دکھ اور افسوس کا اظہار کرتے ہوئے کہا کہ علامہ ساجد میر کی سیاسی، مذہبی اور سماجی خدمات ناقابل فراموش ہیں۔

انہوں نے کہا کہ ایوان بالا میں قانون سازی کے عمل میں جس خلوص، دانائی اور بصیرت کے ساتھ انہوں نے خدمات انجام دیں، وہ قابل ستائش ہیں،ان کی وفات سے جو خلا پیدا ہوا ہے، اسے پٴْر کرنا نہایت مشکل ہوگا۔ڈپٹی چیئرمین سینیٹ سیدال خان نے بھی سینیٹر پروفیسر ساجد میر کے انتقال پر افسوس کا اظہار کرتے ہوئے کہا کہ وہ ایک مدبر، باوقار اور علم دوست شخصیت کے مالک تھے جنہوں نے ہمیشہ اتحاد بین المسلمین، اعتدال پسندی اور علم و حکمت کو فروغ دیا۔

(جاری ہے)

سینیٹ میں قائد ایوان سینیٹر اسحاق ڈار اور قائد حزب اختلاف سینیٹر سید شبلی فراز نے بھی سینیٹر پروفیسر ساجد میر کی دینی، علمی اور پارلیمانی خدمات کو خراج تحسین پیش کیا اور ان کی وفات کو قوم کا بڑا نقصان قرار دیا۔انہوں نے کہا کہ سینیٹر ساجد میر کا شمار ان شخصیات میں ہوتا ہے جنہوں نے نصف صدی سے زائد عرصے تک ملک میں دینی تعلیم، سیاست اور بین الاقوامی سطح پر اسلامی افکار کے فروغ میں کلیدی کردار ادا کیا۔ وہ متعدد بار سینیٹ کے رکن منتخب ہوئے اور ہمیشہ اصولوں کی سیاست کے حامی رہے۔