اپنی زمین اپنا گھر اسکیم کا اجرا، ہر روز مزید 300 گھر بننے لگے

اپنا گھرپروگرام میرے دل کے بہت قریب ہے، مریم نواز

ہفتہ 3 مئی 2025 19:38

اپنی زمین اپنا گھر اسکیم کا اجرا، ہر روز مزید 300 گھر بننے لگے

لاہو (اُردو پوائنٹ اخبارتازہ ترین - آن لائن۔ 03 مئی2025ء) پنجاب میں اپنی چھت اپنا گھر پروگرام کے بعد اپنی زمین اپنا گھر پروگرام کا اجرا کردیا گیا ہے۔وزیراعلیٰ مریم نواز شریف نے بٹن دبا کر اپنی زمین اپنا گھر ای پورٹل کا باقاعدہ آغاز کیا۔ عوام ای پورٹل azag.punjab.gov.pk پر مفت پلاٹ کے لیے اپلائی کر سکیں گے، پنجاب کے 19 اضلاع میں 23 ہاؤسنگ اسکیموں میں 2 ہزار پلاٹ دیے جائیں گے، ‘اپنی زمین اپنا گھر’ اسکیم کے تحت بے گھر شہریوں کو 3 مرلے کے پلاٹ مفت دیے جائیں گے۔

اپنی زمین اپنا گھر کے تحت قرعہ اندازی میں پلاٹ حاصل کرنے والے افراد قرض بھی حاصل کرسکیں گے، اس اسکیم کے پہلے مرحلے میں جہلم، پتوکی، ماموں کانجن، لودھراں اور رینالہ خورد میں مفت پلاٹ دیے جائیں گے۔منصوبے کی لانچنگ کے موقع پر وزیراعلیٰ مریم نواز نے کہا کہ ‘اپنی چھت، اپنا گھر’ پروگرام میرے دل کے بہت قریب ہے،بے گھر افراد کو چھت کی فراہمی قائد محمد نواز شریف کا ویڑن ہے محمد نوازشریف صاحب لوگوں کے گھر کی تکمیل کا سن کر بہت خوش ہوتے ہیں۔

(جاری ہے)

ان کا کہنا تھا کہ 6 ماہ کی قلیل مدت میں تقریباً 34 ہزار گھر بن رہے ہیں۔ 2 ہزار مکمل بھی ہوچکے ہیں، یہ 34 ہزار گھر نہیں بلکہ دعائیں ہیں۔ وزیراعلیٰ نے پروگرام کے تحت مکان بنانے والے افراد کو مبارکباد پیش کرتے ہوئے کہا کہ اپنی منصوبے کے لیے آسان ترین قسط اور 3 ماہ کا گریس پریڈ مقرر کیا گیا ہے، قرضوں کی واپسی بھی شروع ہوچکی ہے۔ پنجاب بھر میں بہت سے لوگوں کے پاس گھر بنانے کے لیے نہ زمین ہے نہ پیسے۔

انہوں نے کہا کہ پہلے مرحلے میں 2000 لوگوں کو مفت پلاٹ دیے جائیں گے، آج تک جتنی بھی حکومتیں رہیں اپنے دور میں کئی دہائیوں تک 34 ہزار گھر بھی نہیں بناسکیں۔ اپنے گھر سے تحفظ کا احساس ملتا ہے، کہنا آسان ہے مگر عام آدمی کے لیے گھر کا حصول بہت مشکل ہے۔ انہوں نے کہا کہ اپنی چھت، اپنا گھر پروگرام کے تحت ایک سے 10 مرلہ تک پلاٹ مالکان قرض کے لیے اپلائی کر سکتے ہیں۔