فیصل آباد پولیس کا کریک ڈائون،چار ماہ میں 145 جرائم پیشہ گینگز کے 376 ملزمان گرفتار، کروڑوں روپے کا مال مسروقہ برآمد

پیر 5 مئی 2025 11:23

مکوآنہ (اُردو پوائنٹ اخبارتازہ ترین - این این آئی۔ 05 مئی2025ء)فیصل آباد پولیس نے جرائم پیشہ عناصر کے خلاف جاری کریک ڈاؤن کے دوران گزشتہ چار ماہ کے دوران 145 گینگز کے 376 ملزمان کو گرفتار کر لیا۔ گرفتار ملزمان کے قبضے سے 10 کروڑ 41 لاکھ 87 ہزار روپے مالیت کا مال مسروقہ برآمد کیا گیا۔

(جاری ہے)

پولیس ترجمان کے مطابق، ملزمان سے برآمد شدہ سامان میں 2 کاریں، 467 موٹر سائیکلیں، 11 لوڈر رکشے، 55 موبائل فونز، 4 لیپ ٹاپ، 2 موٹر سائیکل رکشے، 25 کیبل تاریں، 25 بیٹریاں، سولر پلیٹس، زیورات، نقدی اور دیگر قیمتی اشیاء شامل ہیں۔

اس کے علاوہ ان سے 38 عدد مویشی بھی برآمد کیے گئے۔پولیس نے مزید بتایا کہ گرفتار ملزمان چوری، ڈکیتی اور رابری کے متعدد مقدمات میں مطلوب تھے۔ ملزمان کے قبضے سے بھاری مقدار میں اسلحہ بھی برآمد ہوا جس میں 124 عدد 30 بور پستول، ایک کاربین، ایک موذر، دو رپیٹر، تین ریوالور، ایک کلاشنکوف اور سینکڑوں گولیاں شامل ہیں۔پولیس حکام کے مطابق برآمد کیا گیا مال مسروقہ اصل مالکان کے حوالے کر دیا گیا ہے جبکہ مزید تفتیش جاری ہے۔