ای چالان کالعدم قرار دینے کیخلاف پنجاب حکومت کی اپیل پر لاہور ہائیکورٹ میں سماعت

پیر 5 مئی 2025 17:10

لاہور (اُردو پوائنٹ اخبارتازہ ترین - اے پی پی۔ 05 مئی2025ء) لاہور ہائیکورٹ کے سنگل بینچ کی جانب سے ای چالان کو غیر قانونی قرار دینے کے فیصلے کے خلاف پنجاب حکومت کی انٹرا کورٹ اپیل پر سرکاری وکیل کو دلائل کی تیاری کی مہلت دیتے ہوئے سماعت ملتوی کردی گئی۔لاہورہائیکورٹ کے جسٹس فاروق حیدر کی سربراہی میں دو رکنی بینچ نے ای چالان کالعدم قرار دینے سے متعلق سنگل بینچ کے فیصلے کے خلاف پنجاب حکومت کی انٹرا کورٹ اپیل پر پیر کو سماعت کی۔

(جاری ہے)

پنجاب حکومت نے اپیل میں موقف اختیار کیا ہے کہ عدالت عالیہ کے سنگل بنچ نے ای چالان سے متعلق فیصلے میں قانونی ضابطے پورے نہیں کئے، سیف سٹی اتھارٹی کی ہدایت پرای چالان مکمل طور پر قانونی تحفظ کے ساتھ کئے جا رہے ہیں، عدالت سے استدعاہے چالان سے متعلق عدالت عالیہ کے سنگل بنچ کے فیصلے کو کالعدم قرار دیا جائے۔ دوران سماعت سرکاری وکیل نے عدالت سے استدعا کی کی دلائل کے لیے مزید تیاری کی مہلت کی دی جائے جس پر دو رکنی بینچ نے سرکاری وکیل کی استدعا منظور کرتے ہوئے سماعت ملتوی کردی۔