Live Updates

پاکستان کرکٹ بورڈ سے دلبرداشتہ کھلاڑی نے انگلینڈ سے ڈیبیو پر نظریں جما لیں

لاہور سے تعلق رکھنے والے 30 سالہ کرکٹر ظفر گوہر 2 میچز میں پاکستان کی نمائندگی کرچکے ہیں

ذیشان مہتاب منگل 6 مئی 2025 10:46

پاکستان کرکٹ بورڈ سے دلبرداشتہ کھلاڑی نے انگلینڈ سے ڈیبیو پر نظریں ..

لاہور (اردو پوائنٹ تازہ ترین اخبار ۔ 6 مئی 2025ء ) پاکستان کے سابق اسپنر ظفر گوہر انگلینڈ کی نمائندگی کے منتظر ہیں۔

برطانوی شہریت حاصل کرنے والے ظفر گوہر بطور لوکل پلیئر مڈل سیکس میں صلاحیتوں کے جوہر دکھا چکے ہیں، نئے ملک کی نمائندگی کے لیے اہل ہونے کی تاریخ کا انتظار ہے۔

2015ء میں گھر پر سوئے رہنے کی وجہ سے انگلینڈ کے خلاف ٹیسٹ میچ کھیلنے سے محروم رہنے والے اسپنر ظفر گوہر نے اس سیزن میں کاؤنٹی چیمپئن شپ میں عمدہ کارکردگی کا مظاہرہ کیا ہے، وہ برطانوی پاسپورٹ حاصل کرنے کے بعد مقامی پلیئر کے طور پر مڈل سیکس کی نمائندگی کررہے ہیں۔

لاہور میں پیدا ہونے والے 30 سالہ ظفر گوہر نے ملک کی تبدیلی کیلیے آئی سی سی کی جانب سے رائج اہلیت کے معیار کو پورا کرلیا ہے، انہوں نے پاکستان کی جانب سے کھیلے گئے اپنے 2 میچز میں سے آخری 3 برس قبل کھیلا تھا، اب انہیں صرف انگلینڈ کی نمائندگی کیلیے دستیاب ہونے کی حتمی تاریخ کی تصدیق کا انتظار ہے۔

(جاری ہے)

ظفر گوہر نے انکشاف کیا کہ اکتوبر 2015ء میں انہیں یاسرشاہ کے انجرڈ ہونے کی وجہ سے انگلینڈ کے خلاف ٹیسٹ کیلیے طلب کیا گیا، میں اس وقت فیصل آباد میں 4 روزہ میچ کھیل رہا تھا، جب مجھے کال موصول ہوئی وہ دوسرے دن کے چائے کا وقت تھا، مجھے کہا گیا کہ لاہور جاکر اپنا سامان لو تب تک مجھے بتایا جائے گا کہ یواے ای کی فلائٹ کب ہے، جہاں پر پاکستان سیریز کھیل رہا تھا، فلائٹ صبح کے 3 بجے کی بک ہوئی، مجھے ویزا درکار تھا اور سفارتخانہ بند ہوچکا تھا، اس دوران رات کے ایک بج گئے، میں نے ان سے کہا کہ میں بہت تھکا ہوا ہوں اور نیند آرہی ہے مجھے کہا گیا کہ فون اپنے ساتھ رکھنا مگر میں نہیں جاگ سکا اور اگلی صبح سارا ملبہ مجھ پر ڈال دیا گیا۔

ظفر گوہر کا دل ایک ماہ بعد پھر ٹوٹا جب انہوں نے تیسرے ون ڈے میں انگلش کرکٹر الیکس ہیلز اور جو روٹ کو آؤٹ کیا، اس میچ میں ان کی ٹیم ہاری اور انھیں دوبارہ اس طرز میں موقع نہیں ملا۔

2021ء میں انھیں کرائسٹ چرچ میں پاکستان کی پھر نمائندگی کا موقع میسر آیا، جس میں انہوں نے 71 رنز بنائے مگر وکٹ نہیں لے سکے۔

ظفر گوہر کا کہنا ہے مجھے نئے چیف سلیکٹر محمد وسیم نے کہا کہ آپ کو ٹیم میں واپسی کیلیے وقت چاہیے، 2022ء کے کاؤنٹی سیزن میں میں نے گلوسٹرشائر کی جانب سے 47 وکٹیں لینے کے ساتھ 500 رنز بنائے اور جب میں واپس پاکستان گیا تو چیف سلیکٹر نے مجھے کہا کہ کاؤنٹی کرکٹ میں آپ جیسا مرضی کھیلو مجھے اس کی پروا نہیں، میں کھلاڑیوں کا انتخاب کرتے ہوئے کاؤنٹی پرفارمنس پر غور نہیں کرتا۔

بعد ازاں ظفر گوہر نے پاکستان کے بجائے انگلینڈ کی جانب سے کھیلنے کا فیصلہ کیا اور اب اپنے خواب کے سچ ثابت ہونے کا انتظار ہے۔

وہ 2025ء کاؤنٹی چیمپئن شپ سیزن کے پہلے 4 راؤنڈز میں 15 وکٹوں کے ساتھ پہلے ہی کیس مضبوط کررہے ہیں۔