منشیات کی روک تھام کیلئے تعلیمی اداروں میں طلبہ کو براہ راست اشیاء کی ڈیلیوری روکنے کا حکم

بچے پیزا وغیرہ منگواتے ہیں اور ساتھ منشیات بھی منگوا لیتے ہیں، جتنے ڈلیوری والے ہیں براہ راست ڈلیوری پہنچا رہے ہیں اس پر پابندی لگانی ہے؛ اسلام اباد ہائیکورٹ کے جسٹس انعام امین منہاس کے ریمارکس

ساجد علی پیر 12 مئی 2025 12:39

اسلام آباد ( اُردو پوائنٹ اخبارتازہ ترین۔ 12 مئی 2025ء ) عدالت نے منشیات کی روک تھام کیلئے تعلیمی اداروں میں طلبہ کو براہ راست اشیاء کی ڈیلیوری روکنے کا حکم دے دیا۔ تفصیلات کے مطابق اسلام آباد ہائیکورٹ نے منشیات کی روک تھام کیس میں تعلیمی اداروں میں طلبہ کو براہ راست اشیاء کی ڈیلیوری روکنے کا حکم دیا ہے، اس حوالے سے تعلیمی اداروں میں منشیات کی روک تھام اور آگاہی کیلئے تعلیمی نصاب میں شامل کرنے کی درخواست پر سماعت ہوئی جہاں اسلام آباد ہائیکورٹ کے جسٹس انعام امین منہاس نے درخواست پر سماعت کی، ابتدائی سماعت کے بعد عدالت نے حکم دیا کہ طلبہ کو براہ راست ڈلیوریز روک دی جائیں، جو سکول اور کالج عمل درآمد نہیں کرتا اس کے خلاف کارروائی کریں، نیشنل اینٹی نارکوٹکس کونسل تشکیل دی گئی یا نہیں؟ سیکریٹری کابینہ اس حوالے سے سے رپورٹ جمع کروائیں۔

(جاری ہے)

دوران سماعت جسٹس انعام امین منہاس نے استفسار کیا کہ ’نیشنل اینٹی نارکوٹکس کونسل کیوں نہیں بنی؟ یہ بڑی ہائی پاور کونسل ہے، وزیراعظم سربراہ اور چاروں صوبوں کے وزرائے اعلیٰ شامل ہیں، کیا آپ کو معلوم ہے کہ منشیات سکولوں اور کالجوں میں داخل کیسے ہوتی ہے؟‘۔ جسٹس انعام امین منہاس نے ریمارکس دیئے کہ ’کوریئر اور ڈلیوری والوں کے ذریعے سکولوں اور کالجوں میں منشیات پہنچتی ہیں، چیک کرکے بتائیں کہ کن کن اسکولوں اور کالجوں میں کیا کیا ڈلیوریاں آتی ہیں؟ جہاں بچے پیزا وغیرہ منگواتے ہیں اور ساتھ منشیات بھی منگوا لیتے ہیں، جتنے ڈلیوری والے ہیں براہ راست ڈلیوری پہنچا رہے ہیں اس پر پابندی لگانی ہے، آپ اس پر عمل درآمد کر کے آئندہ تاریخ پر رپورٹ پیش کریں، چیک کریں کن کن سکولوں اور کالجوں میں کثرت سے ڈائریکٹ ڈلیوریز ہو رہی ہیں جو سکول اور کالج عمل درآمد نہیں کرتا اُن کے خلاف ایکشن لیں‘، بعد ازاں عدالت نے کیس کی سماعت 28 مئی تک ملتوی کردی۔