موبائل کمپنیوں کی جانب سے صارفین سے لیے جانے والے ٹیکس کی تفصیلات قومی اسمبلی میں پیش

موبائل کمپنیوں کی جانب اکٹھا کیا گیا ٹیکس قومی خزانے میں جمع کروایا جاتا ہے،وزارت خزانہ کی اجلاس میں بریفنگ

پیر 12 مئی 2025 23:20

اسلام آباد(اُردو پوائنٹ اخبارتازہ ترین - این این آئی۔ 12 مئی2025ء)موبائل کمپنیوں کی جانب سے صارفین سے لیے جانے والے ٹیکس کی تفصیلات قومی اسمبلی میں پیش کر دی گئیں جبکہ وزارت خزانہ نے بتایاہے کہ موبائل کمپنیوں نے 9ماہ میں مجموعی طور پر 84ارب 24کروڑ 90لاکھ روپے ٹیکس اکٹھا کیا، موبائل کمپنیوں کی جانب اکٹھا کیا گیا ٹیکس قومی خزانے میں جمع کروایا جاتا ہے۔

سپیکر ایاز صادق کی زیر صدارت قومی اسمبلی کا اجلاس ہوا جس دوران وقفہ سوالات میں پارلیمانی سیکرٹری اور سیز پاکستانیز بیرسٹر سعد وسیم نے کہا کہ بیرون ملک مقیم پاکستانیوں کے روشن ڈیجیٹل اکاؤنٹس کی تعداد 8لاکھ 5ہزار 9ہوگئی، روشن ڈیجیٹل اکاؤنٹس میں مجموعی طورپر9 ارب 98کروڑ ڈالرموصول ہوئے، بیرون ملک مقیم پاکستانی 10 غیرملکی کرنسیوں میں روشن ڈیجیٹل اکاؤنٹس اوپن کروا سکتے ہیں۔

(جاری ہے)

وزارت تعلیم کی جانب سے بتایا گیا کہ فیڈرل ڈائرکٹوریٹ آف ایجوکیشن کے تحت اسلام آباد میں اسکولز اور کالجزکی مجموعی تعداد 432ہے، شہری علاقوں میں 149اور دیہی علاقوں میں اسکولز اور کالجز کی تعداد 283ہے، وفاقی حکومت کے زیر انتظام ملک بھر میں مجموعی طور پر 46یونیورسٹیاں ہیں، سرکاری یونیورسٹیوں کی تعداد 31اور نجی شعبے کی 15یونیورسٹیاں ہیں۔

موبائل کمپنیوں کی جانب سے صارفین سے لیئے جانے والے ٹیکس کی تفصیلات بھی قومی اسمبلی میں پیش کی گئیں ، وزارت خزانہ نے کہا کہ موبائل کمپنیوں نے 9ماہ میں مجموعی طور پر 84ارب 24کروڑ 90لاکھ روپے ٹیکس اکٹھا کیا، موبائل کمپنیوں کی جانب اکٹھا کیا گیا ٹیکس قومی خزانے میں جمع کروایا جاتا ہے۔وزارت خزانہ نے کہاکہ ایف بی آر نے ٹیکس ترمیمی قانون کے ذریعے 23لاکھ 91ہزار566نئے ٹیکس دہندگان کو رجسٹرڈ کیا، 29اپریل 2025تک ٹیکس گوشوارے جمع کرانے والوں کی تعداد 65لاکھ 94 ہزار 832ہوگئی ہے، ایسوسی ایشن آف پرپرسنزکی تعدادایک لاکھ 6ہزار 118، 93ہزار 749کمپنیوں نے ٹیکس گوشوارے جمع کروائے۔