کے الیکٹرک کی غیراعلانیہ لوڈشیڈنگ، شہری مشکلات کا شکار

گرمی اور حبس کے دوران طویل لوڈشیڈنگ نے ان کی زندگی کو مفلوج کر دیا ہے،شہری

جمعرات 15 مئی 2025 17:09

کراچی (اُردو پوائنٹ اخبارتازہ ترین - این این آئی۔ 15 مئی2025ء) شہر قائد میں گرمی کی شدت کے ساتھ ہی کے الیکٹرک کی جانب سے اعلانیہ و غیر اعلانیہ لوڈشیڈنگ کا سلسلہ تیز ہوگیا ہے، جس سے شہری شدید مشکلات میں مبتلا ہو گئے ہیں۔گزشتہ دس برس سے بجلی کی بندش سے مستثنیٰ علاقوں اردو بازار، رتن تلاو، پریڈی اسٹریٹ اور فریئر مارکیٹ میں اچانک 10 گھنٹے طویل لوڈشیڈنگ کا آغاز کر دیا گیا، جس پر علاقہ مکینوں نے شدید ردِعمل کا اظہار کیا ہے۔

علاقہ مکینوں کا کہنا ہے کہ گرمی اور حبس کے دوران طویل لوڈشیڈنگ نے ان کی زندگی کو مفلوج کر دیا ہے، بزرگ افراد، خواتین اور بچے خاص طور پر اذیت میں مبتلا ہیں، جبکہ کاروباری سرگرمیاں بھی شدید متاثر ہو رہی ہیں۔مقامی شہریوں کے مطابق علاقے میں سو فیصد بلنگ کی جاتی رہی ہے اور گزشتہ ایک دہائی سے لوڈشیڈنگ کا سامنا نہیں ہوا، مگر اب بغیر کسی پیشگی اطلاع کے گھنٹوں بجلی بند کی جا رہی ہے۔

(جاری ہے)

شہریوں کا یہ بھی کہنا ہے کہ کے الیکٹرک حکام سے شکایات کرنے پر کوئی سنوائی نہیں ہو رہی اور نہ ہی لوڈشیڈنگ کی باقاعدہ وجوہات سے آگاہ کیا جا رہا ہے، بجلی کی بندش کے ساتھ ساتھ پانی کا بحران بھی شدت اختیار کر گیا ہے، جس سے مکین دہری مشکلات کا شکار ہیں۔متاثرہ علاقوں کے رہائشیوں نے کے الیکٹرک اور اعلی حکام سے مطالبہ کیا ہے کہ وہ فوری طور پر اس غیر اعلانیہ لوڈشیڈنگ کا نوٹس لیں اور بجلی کی فراہمی کو بحال کیا جائے تاکہ روزمرہ زندگی معمول پر آسکے۔