انسداد رشوت ستانی عدالت، چوہدری پرویز الہی سمیت دیگر ملزمان کے خلاف سماعت ملتوی

جمعرات 15 مئی 2025 18:17

لاہور (اُردو پوائنٹ اخبارتازہ ترین - اے پی پی۔ 15 مئی2025ء) لاہور کی انسداد رشوت ستانی کی خصوصی عدالت نے سابق پرنسپل سیکرٹری محمد خان بھٹی سمیت دیگر ملزمان کے خلاف پنجاب اسمبلی میں غیر قانونی بھرتیوں کے درج مقدمہ میں چوہدری پرویز الٰہی کی ایک روزہ حاضری معافی کی درخواست منظور کرتے ہوئے مزید سماعت آئندہ ہفتے تک ملتوی کردی جبکہ ایک شریک ملزم کی بریت کی درخواست پر وکلا کو دلائل پیش کرنے کیلئے آئندہ سماعت پر طلب کر لیا۔

(جاری ہے)

جمعرات کو سماعت پر سابق پرنسپل سیکرٹری محمد خان بھٹی نے عدالت کے روبرو پیش ہو کر حاضری مکمل کروائی جبکہ پرویز الہی کی ایک روزہ حاضری معافی کی درخواست دائر کی گئی۔درخواست میں کہا گیا کہ طبیعت ناساز ہے، ڈاکٹرز نے آرام کا مشورہ دیا ہے،عدالت ایک روزہ حاضری معافی کی درخواست منظور کرے۔عدالت نے کیس میں ایک شریک ملزم مختار احمد رانجھا کی بریت کی درخواست پر وکلا کو آئندہ سماعت پر دلائل کیلئے طلب کرلیا ۔