پاک چائنہ سٹڈیزاورکنفیوشیئس انسٹیٹیوٹ کے زہر اہتمام’’ کنفیوشیئس انسٹیٹیوٹ لیڈرز میٹ اپ‘‘کےعنوان سے تقریب کا انعقاد

سرگودھا (اُردو پوائنٹ اخبارتازہ ترین - اے پی پی۔ 15 مئی2025ء) یونیورسٹی آف سرگودھا کی جانب سے پاکستان اور چین کے مابین تعلیمی تعاون کو فروغ دینے، ثقافتی ہم آہنگی کو بڑھانے اور دوطرفہ اشتراک کو مزید مضبوط کرنے کے لیے خصوصی تقریب کا انعقاد کیا گیا۔ پاکستان انسٹیٹیوٹ آف چائنہ سٹڈیز اور کنفیوشیئس انسٹیٹیوٹ کے زہر اہتمام ’’ کنفیوشیئس انسٹیٹیوٹ لیڈرز میٹ اپ‘‘ کے عنوان سے منعقدہ اس تقریب میں وائس چانسلر یونیورسٹی آف سرگودھا پروفیسر ڈاکٹر قیصر عباس بطور مہمانِ خصوصی شریک ہوئے جبکہ چائنیز ڈائریکٹر کنفیوشیئس انسٹیٹیوٹ پروفیسر چن یون شیانگ نے بذریعہ ویڈیو لنک شرکت کی۔

اس موقع پر ڈائریکٹر پاکستان انسٹیٹیوٹ آف چائنہ سٹڈیز پروفیسر ڈاکٹر طاہر ممتاز اعوان سمیت چینی زبان کے طلبہ بڑی تعداد میں موجود تھے۔

(جاری ہے)

تقریب کا آغاز روایتی چینی موسیقی، تائی چی کے دلکش مظاہرے اور پاک چین دوستی کے نغمے سے ہوا، جنہیں ایچ ایس کے پروگرام کے ہونہار طلبہ نے پیش کیا۔ یہ فنکارانہ مظاہرے نہ صرف زبان وثقافت سے وابستگی کا ثبوت تھے بلکہ دونوں اقوام کے درمیان خیرسگالی، احترام اور رفاقت کے جذبات کا عکاس بھی بنے۔

وائس چانسلر پروفیسر ڈاکٹر قیصر عباس نے اپنے خطاب میں تعلیمی سفارت کاری اور بین الثقافتی مکالمے کی اہمیت پر زور دیتے ہوئے متعدد مشترکہ منصوبوں کا اعلان کیا، جن میں یونیورسٹی میں ایک جدید اسپتال کے قیام، روایتی چینی طب کا آغاز، اورمنفرد تعلیمی پروگرام شامل ہے، جن کے دو سال یونیورسٹی آف سرگودھا میں اور آخری سال چین کی کسی پارٹنر یونیورسٹی میں مکمل ہوں گے۔

انہوں نے ایک بین الاقوامی بورڈنگ سکول اور زرعی جدت کو فروغ دینے کے لیے ایک سٹریس پروسیسنگ یونٹ کے قیام کا بھی عندیہ دیا۔انہوں نے بتایا کہ ان پراجیکٹس کا آغاز کرنے کے لیے ابتدائی تیاریاں مکمل کر لی گئی ہیں۔ پروفیسر ڈاکٹر قیصر عباس نے طلبہ کو چینی زبان پر عبور حاصل کرنے کی ترغیب دی اور کہا کہ زبانیں صرف رابطے کا ذریعہ نہیں بلکہ مواقع کی کنجی بھی ہوتی ہیں، خصوصاً تعلیم، تجارت اور سفارت کاری میں پروفیسر چن یون شیانگ نے یونیورسٹی آف سرگودھا کے تعلیمی و ثقافتی تعاون کو سراہتے ہوئے یقین دلایا کہ چین ایسے اقدامات کی بھرپور حمایت جاری رکھے گا جو عوامی سطح پر روابط اور باہمی احترام کو فروغ دیں۔

پروفیسر ڈاکٹر طاہر ممتاز اعوان نے بتایا کہ اب تک دو ہزار سے زائد طلبہ چینی زبان سیکھنے کے مختلف درجات مکمل کر چکے ہیں جبکہ 192 طلبہ اس وقت کورسز میں زیرِ تعلیم ہیں۔ انہوں نے آئندہ بزنس چائنیز اور ثقافتی مطالعات کے خصوصی کورسز کے آغاز کا بھی اعلان کیا۔ تقریب کے اختتام پر طلبہ نے چینی ثقافت سے متاثرہ اپنی تخلیقات وائس چانسلر کو پیش کیں، جو دوستی، سیکھنے کے جذبے اور بین الثقافتی ہم آہنگی کی علامت تھیں۔