دنیا میں سب سے زیادہ کمائی کرنیوالا ایتھلیٹ کون نئی فہرست جاری

ہفتہ 17 مئی 2025 22:23

واشنگٹن (اُردو پوائنٹ اخبارتازہ ترین - این این آئی۔ 17 مئی2025ء)امریکی جریدے فوربز نے 2025 کی دنیا میں سب سے زیادہ کمائی کرنے والے ایتھلیٹس کی فہرست جاری کر دی۔فوربز کے مطابق پرتگال کے اسٹار فٹبالر کرسٹیانو رونالڈو نے لگاتار تیسرے سال فوربز کی سب سے کمائی کرنے والے ایتھلیٹس کی فہرست میں پہلا نمبر حاصل کیا ہے۔کاروباری میگزین کے مطابق رونالڈو، جو اپنے کیریئر کے دوران 5 بار اس فہرست میں سرفہرست رہ چکے ہیں، نے 2025 میں اپنی مجموعی آمدنی میں 15 ملین ڈالر کا اضافہ کیا ہے، جس کے بعد اب ان کی کل آمدنی275 ملین ڈالر ہو چکی ہے۔

40 سالہ رونالڈو نے دسمبر 2022 میں سعودی پرو لیگ کے کلب النصر میں شمولیت اختیار کی، جس کے بعد انہوں نے میدان سے باہر برانڈز، اشتہارات اور اسپانسرشپ کے ذریعے بڑی آمدنی حاصل کی۔

(جاری ہے)

2025 کی سب سے کمائی کرنے والے ایتھلیٹس کی فہرست میں دوسرا نمبر امریکی باسکٹ بال کھلاڑی اسٹیفن کری کا ہے جن کی آمدنی 156 ملین ڈالر ہوگئی ہے۔اس کے علاہ برطانوی باکسر ٹائسن فیوری 146 ملین ڈالر کمائی کے ساتھ تیسرے نمبر پر آگئے۔

رونالڈو کے حریف فٹبالر لیونل میسی اب پرتگالی اسٹار سے مزید پیچھے ہو گئے ہیں اور تیسرے سے پانچویں نمبر پر آ چکے ہیں۔سب سے زیادہ کمائی کرنیوالے 10 کھلاڑیوں میں کرسٹیانو رونالڈو (فٹبالر) 275 ملین ڈالر‘ اسٹیفن کری (باسکٹ بال) 156 ملین ڈالر ‘ ٹائسن فیوری (باکسنگ) 146 ملین ڈالر ‘ ڈاک پریسکوٹ (فٹبالر) 137 ملین ڈالر‘ لیونل میسی (فٹبالر)135 ملین ڈالر‘ لیبرون جیمز (باسکٹ بالر)133.8 ملین ڈالر ‘ یوان سوٹو (بیس بال)114 ملین ڈالر‘کریم بینزیما (فٹبالر) 104 ملین ڈالر ‘ شوہی اوہتانی (بیس بال)102.5 ملین ڈالر اور10ویں نمبر پرکیون دیورنٹ 101.4 ملین ڈالر شامل ہیں۔