گورننس کی بہتری کے لئے مختلف محکمہ جات کی نگرانی کی جا رہی ہے۔بریگیڈئیر (ر)بابر علاوالدین چیئر پرسن

وزیرآباد (اُردو پوائنٹ اخبارتازہ ترین - اے پی پی۔ 18 مئی2025ء) چیئرپرسن چیف منسٹر ڈائریکٹوریٹ آف ایویلوایشن، فیڈ بیک، انسپکشن اینڈ مانیٹرنگ حکومت پنجاب بریگیڈیئر(ر) بابر علاؤ الدین نےچوہدری پرویز الہی انسٹی ٹیوٹ آف کارڈیالوجی ہسپتال وزیرآباد کا دورہ کیا۔ مریضوں کو دی جانے والی طبی سہولیات اور ادویات کی دستیابی کا جائزہ لیا اس موقع پر انہوں نے کہا کہ وزیر اعلیٰ پنجاب مریم نواز کے احکامات پر گورننس کی بہتری کے لیے مختلف محکمہ جات کی مکمل نگرانی کی جارہی ہے تا کہ عوام کی معیار زندگی کو بہتر بنایا جائے سرکاری اداروں پر عوام کے اعتماد کو بحال کیا جائے اور حکومتی سروسز کی فراہمی، آسانی، شفافیت اور بہتری لائی جا سکے۔

وزیرآباد میں پرویز الٰہی انسٹی ٹیوٹ آف کارڈیالوجی کے خصوصی دورہ کے موقعہ پر انہوں نے مختلف وارڈز کا معائنہ کیا، ڈاکٹروں کی طبی خدمات کا جائزہ لیا اور مریضوں سے ہسپتال میں فراہم کی جانے والی خدمات بارے استفسار کیا۔

(جاری ہے)

اس موقعہ پر ڈپٹی ایم ایس ڈاکٹر منور، قمر خان، پروفیسر ڈاکٹر عبدالستار،ڈاکٹر محسن محمود، ڈاکٹر فیصل شہزاد رومی،پروفیسر ڈاکٹر رابعہ بشارت،پروفیسر ڈاکٹر انعم ظہور نے انہیں اپنے اپنے شعبہ جات کے متعلق بریفنگ دی۔

کارڈیالوجی میں موجود مریضوں نے بتایا کہ یہ ہسپتال علاقہ کے لیے کسی نعمت سے کم نہیں ہے مجموعی طور پر ہسپتال میں طبی خدمات میں بہتری آنے کی بابت بتایا اور کہا کہ انہیں کارڈیالوجی ہسپتال میں بالکل مفت علاج معالجہ کی سہولیات دی جا رہی ہیں۔ مریضوں نے بتایا کہ ایمرجنسی کی حد تک ہسپتال میں صورتحال بہتر ہے تاہم ان ڈور سروسز میں بہتری کی گنجائش موجود ہے۔

اس موقعہ پر یہ معاملہ بھی سامنے آیا کہ دودراز سے بھاری کرایے لگا کر کارڈیالوجی انسٹی ٹیوٹ سے رجوع کرنے والے ہارٹ سے متعلقہ سیریس امراض میں مبتلا مریضوں کیلئے بروقت درکار ضروری سرجری جیسی حالت میں بھی کیتھ کانفرنس، اینجیو گرافی، ٹیسٹوں وغیرہ کیلئے دو دو سال کا وقت دے دیا جاتا ہے، فارمیسی کے باہر ادویات کے حصول کیلئے لمبی قطاروں میں لگے مریضوں کیلئے سخت گرمی میں پنکھوں کا بھی مناسب بندوبست نہ ہے۔

کارڈیالوجی انسٹی ٹیوٹ میں ڈائیلسز کے خصوصی وارڈ کا بندوبست نہ ہونے سے دل کے امراض کیساتھ ساتھ گردوں کے امراض میں مبتلا مریضوں کو دوسرے ہسپتالوں میں آنے جانے کیلئے دوہری تکالیف اٹھانا پڑتی ہیں۔ چیئرپرسن نے مریضوں، ان کے لواحقین اور میڈیا نمائندگان کی تجاویز کا خیر مقدم کیا شکایات کے فوری ازالے کیلئے مناسب اقدامات اٹھانے کے عزم کا اعادہ کیا۔

بریگیڈیئر ر بابر علاؤالدین نے کہا کہ ہسپتال میں عملے کی کمی جیسی شکایات کو فوری دور کرنے کیلئے اقدامات اٹھائے جائیں گے۔ انہوں نے ڈاکٹروں کو امراض قلب کے اہم ادارے میں سروسز کو مزید بہتر کرنے کی ہدایات دیتے ہوئے کہا کہ ایمرجنسی میں آنے والے مریضوں کو ہنگامی بنیادوں پر ٹریٹ کیا جائے۔ انہوں نے کہا کہ مزید سہولتوں کی فراہمی کیلئے پوری طرح کوشش کی جائے گی۔وزیرآباد کارڈیالوجی ہسپتال کو مزید جدید مشینری سے آراستہ کیا جائے گا جبکہ وزیرآباد میں ڈاکٹرزکی تعیناتیوں میں عدم دلچسپی کی اہم وجہ ڈاکٹرز کی رہائشوں کا نہ ہونا ہے۔لیکن ہم ان کی تعمیر کا معاملہ متعلقہ فورم پر اٹھا کر اسے حل کروائیں گے۔\378