شدید طوفان میں معجزانہ لینڈنگ، کوئٹہ میں فلائی جناح کا طیارہ حادثے سے بچ گیا

سوشل میڈیا پر مسافروں کے بے ہوش ہونے کی خبریں درست نہیں ہیں؛ کمشنر کوئٹہ حمزہ شفقات کا بیان

ساجد علی اتوار 18 مئی 2025 21:45

شدید طوفان میں معجزانہ لینڈنگ، کوئٹہ میں فلائی جناح کا طیارہ حادثے ..

کوئٹہ ( اُردو پوائنٹ اخبارتازہ ترین۔ 18 مئی2025ء ) شدید طوفان میں معجزانہ لینڈنگ کے باعث کوئٹہ میں فلائی جناح کا طیارہ حادثے سے بچ گیا۔ تفصیلات کے مطابق شدید طوفان کے باعث کوئٹہ میں فلائی جناح کا طیارہ معجزاتی طور پر حادثے سے بچ گیا، ذرائع کا کہنا ہے کہ پائلٹ کی انتہائی مہارت نے طیارے کوطوفان میں سنبھال کر سینکڑوں جانیں بچالیں جہاں شدید طوفان کے دوران نجی ائیرلائنز کے طیارے نے 4بار لینڈنگ کی کوشش کی ، ایندھن کم ہونے کے باوجود چوتھی کوشش میں کامیاب لینڈنگ کی گئی جب کہ پی آئی اے کی ایک پرواز کو تیز ہواؤں کے باعث کراچی واپس موڑ دیا گیا۔

(جاری ہے)

کمشنر کوئٹہ حمزہ شفقات نے تصدیق کرتے ہوئے بتایا کہ فلائی جناح کا طیارہ شدید گرد و غبار کے طوفان کے دوران چار بار لینڈنگ کی کوشش کرتا رہا جب کہ ایندھن بھی کم ہو رہا تھا، شکر ہے کہ چوتھی کوشش کامیاب رہی اور ممکنہ تباہی سے بچاؤ ہو گیا، سوشل میڈیا پر مسافروں کے بے ہوش ہونے کی خبریں درست نہیں ہیں، الحمدللہ سب محفوظ ہیں جب کہ طوفان کے باعث پی آئی اے کی پرواز کو تیز اندھی کی وجہ سے کراچی موڑ دیا گیا۔