Live Updates

غزہ صرف فلسطینیوں کا ہے، چینی وزارت خارجہ کا دوٹوک اعلان

چین فلسطینی عوام کے بنیادی حقوق کے تحفظ کے لیے فوری اقدامات کا خواہاں ہے،بیان

منگل 20 مئی 2025 17:12

غزہ (اُردو پوائنٹ اخبارتازہ ترین - این این آئی۔ 20 مئی2025ء)فلسطینی علاقوں پر اسرائیلی قبضے اور جبری بے دخلی کے خلاف چین کا دوٹوک اور واضح موقف سامنے آ گیا ہے۔ چینی وزارت خارجہ نے ایک سخت ردعمل دیتے ہوئے کہا ہے کہ غزہ صرف فلسطینیوں کا ہے اور یہ فلسطین کا اٹوٹ انگ ہے۔ غیرملکی خبررساں ادارے کے م طابق ایک بیان میں انہوں نے کہا کہ فلسطینی عوام کو ان کی زمین سے بے دخل کرنا ناقابل قبول ہے اور چین اس جبری قبضے کو مکمل طور پر مسترد کرتا ہے۔

(جاری ہے)

چینی وزارت خارجہ کے مطابق غزہ پر فلسطینیوں کی ہی حکومت ہونی چاہئے اور یہی اصول لڑائی کے بعد بھی لاگو ہونا چاہئے۔ چین نے کہا ہے کہ وہ فلسطینیوں کے حق خود ارادیت اور ان کے حقوق کی مکمل حمایت کرتا ہے اور دو ریاستی حل کے لیے ہر ممکن سفارتی، سیاسی اور انسانی کوشش کرنے کو تیار ہے۔چین نے غزہ میں فوری اور مستقل جنگ بندی کے فوری نفاذ کی بھرپور حمایت کا اعلان کرتے ہوئے کہا کہ چین غزہ میں جاری انسانی بحران کے خاتمے اور فلسطینی عوام کے بنیادی حقوق کے تحفظ کے لیے فوری اقدامات کا خواہاں ہے۔