لاہور‘ سی سی ڈی کی دو مختلف کارروائیوں میں 2 ڈاکو ہلاک

دونوں ہلاک شدہ ملزمان متعدد ڈکیتی اور راہزنی کی وارداتوں میں ملوث تھے، سی سی ڈی

بدھ 21 مئی 2025 11:58

لاہور(اُردو پوائنٹ اخبارتازہ ترین - این این آئی۔ 21 مئی2025ء)لاہور میں سی سی ڈی (کاؤنٹر کرائم ڈپارٹمنٹ) نے رائیونڈ اور باٹا پور کے مختلف علاقوں میں دو کامیاب چھاپے مارے جن میں مبینہ پولیس مقابلے کے دوران دو ڈاکو ہلاک ہو گئے۔ دونوں ہلاک شدہ ملزمان متعدد ڈکیتی اور راہزنی کی وارداتوں میں ملوث تھے۔رائیونڈ میں سی سی ڈی نے ایک چھاپہ مار کر عامر شہزاد نامی ملزم کو گرفتار کرنے کی کوشش کی۔

ملزم نے پولیس کو دیکھتے ہی فائرنگ شروع کر دی، جس کے جواب میں سی سی ڈی کی جوابی فائرنگ سے عامر شہزاد موقع پر ہی ہلاک ہو گیا۔

(جاری ہے)

ترجمان سی سی ڈی کے مطابق، ہلاک شدہ ملزم پر متعدد سنگین وارداتوں کا مقدمہ درج تھا۔اسی طرح باٹا پور میں بھی سی سی ڈی اقبال ٹاؤن کی ٹیم نے ایک کارروائی کے دوران شوکت علی نامی ملزم کو گرفتار کرنے کی کوشش کی۔ ملزم نے پولیس پارٹی پر فائرنگ کی، جس کے جواب میں پولیس نے بھی جوابی فائرنگ کی، اور شوکت علی موقع پر ہلاک ہو گیا۔

ترجمان نے بتایا کہ شوکت علی بھی مختلف ڈکیتی اور راہزنی کی وارداتوں میں ملوث تھا۔سی سی ڈی کی جانب سے جاری کردہ بیان میں کہا گیا ہے کہ یہ کارروائیاں شہر میں امن و امان قائم رکھنے اور جرائم پیشہ افراد کے خاتمے کے لیے جاری مسلسل کوششوں کا حصہ ہیں۔