معیاری تعلیمی ماحول فراہم کرنا حکومت پنجاب کی ترجیحات میں شامل ہے۔ڈپٹی کمشنر قصور

قصور (اُردو پوائنٹ اخبارتازہ ترین - اے پی پی۔ 21 مئی2025ء) ڈپٹی کمشنر قصور عمران علی نے امتحانی مرکزپیاس کالج قصور اوررورل ہیلتھ سنٹر مصطفی آباد کا تفصیلی دورہ کیا، کالج میں قائم امتحانی سینٹر سمیت درس و تدریس کے عمل، طالبات کو فراہم کی جانے والی سہولیات اور صفائی ستھرائی کے انتظامات کا جائزہ لیا۔ ڈپٹی کمشنر نے امتحانی سینٹر کے مختلف کمروں کا معائنہ بھی کیا۔

انہوں نے امتحانی عمل کی شفافیت، نگرانی کے نظام، نظم و ضبط اور سکیورٹی انتظامات کا بغور جائزہ لیا۔ اس موقع پر ڈی سی نے انتظامیہ کو ہدایت کی کہ امتحانی عمل میں کسی قسم کی کوتاہی برداشت نہیں کی جائے گی اور نقل یا بدعنوانی کی روک تھام کے لیے موثر اقدامات یقینی بنائے جائیں۔ڈپٹی کمشنر نے کالج میں تدریسی سرگرمیوں، اساتذہ کی حاضری، کلاس رومز کی حالت اور تعلیمی ماحول کا بھی مشاہدہ کیا۔

(جاری ہے)

انہوں نے طالبات کو فراہم کی جانے والی سہولیات، مثلاً پینے کے صاف پانی، ٹوائلٹس، بیٹھنے کی جگہ اور صفائی کے انتظامات پر اطمینان کا اظہار کیا، تاہم مزید بہتری کے لیے بعض ضروری ہدایات بھی دیں۔انہوں نے کہا کہ طالبات کو معیاری تعلیمی ماحول فراہم کرنا حکومت پنجاب کی ترجیحات میں شامل ہے۔ضلعی انتظامیہ تعلیمی اداروں کی بہتری کے لیے ہر ممکن تعاون فراہم کرتی رہے گی۔

دریں اثناء ڈی سی عمران علی نے رورل ہیلتھ سنٹر مصطفی آباد کا اچانک دورہ، صفائی ستھرائی، عملے کی حاضری اور دی جانے والی طبی سہولیات، میڈیسن کی دستیابی، سٹاک رجسٹر، ڈینگی تدارک اقدامات اور دی جانے والی علاج معالجے کی سہولیات کا تفصیلی جائزہ لیا۔ ڈپٹی کمشنر نے رورل ہیلتھ سنٹر میں آنے والے مریضوں اور اُن کے لواحقین سے طبی سہولیات بارے دریافت بھی کیا، اس موقع پر ڈی سی نے ہدایات جاری کرتے ہوئے کہاکہ رورل ہیلتھ سنٹر میں آنے والے مریضوں کو علاج معالجے کی معیاری سہولیات کی فراہمی کو ہر صورت یقینی بنایا جائے، مریضوں اور اُن کے لواحقین سے احسن طریقے سے پیش آیا جائے۔

مریضوں کا بہترین علاج، ادویات کی فراہمی کو یقینی بنانا ہسپتال انتظامیہ کی پیشہ ورانہ ذمہ داری ہے جس میں کوتاہی برداشت نہیں کی جائیگی۔