Live Updates

گورنر پنجاب نے سیلاب میں جہیز بہہ جانے والی 9 لڑکیوں کی شادی کی ذمے داری اٹھا لی

سوشل میڈیا پر سیلاب میں بچیوں کے جہیز بہہ جانے کی خبر پرسلیم حیدر نے متاثرہ فیملی کے گھر موہلنوال کا دورہ کیا یہ وقت کسی قسم کی سیاست کا نہیں، سیاست سے بالاتر ہو کر سیلاب متاثرین کی مدد کرنی ہو گی‘ گورنر پنجاب کی گفتگو

بدھ 3 ستمبر 2025 11:55

گورنر پنجاب نے سیلاب میں جہیز بہہ جانے والی 9 لڑکیوں کی شادی کی ذمے داری ..

لاہور(اُردو پوائنٹ اخبارتازہ ترین - این این آئی۔ 03 ستمبر2025ء)گورنر پنجاب سردار سلیم حیدر خان نے سیلاب میں جہیز بہہ جانے والی 9 لڑکیوں کی شادی کی ذمے داری اٹھا لی ۔سوشل میڈیا پر سیلاب میں بچیوں کے جہیز بہہ جانے کی خبر کے بعد گورنر پنجاب سلیم حیدر نے متاثرہ فیملی کے گھر موہلنوال کا دورہ کیا۔گورنر سردار سلیم حیدر خان نے سیلاب سے متاثرہ فیملی اور اہل علاقہ سے ملاقات کی۔

متاثرہ شہریوں نے پانی میں ڈوبے ہوئے اپنے گھر گورنر پنجاب کو دکھائے۔اس موقع پر گفتگو کرتے ہوئے سلیم حیدر خان نے کہا کہ شدید بارشوں اور سیلاب نے پنجاب میں تباہی مچا دی ہے، سیلاب کی تباہی اور قدرتی آفت کے سامنے لوگوں کی بے بسی دیکھ کر میری نیندیں اڑ گئیں۔انہوں نے کہا کہ لوگوں کے گھر سیلاب میں ڈوب گئے، قیمتی سامان پانی میں بہہ گیا، لوگ قبرستانوں میں پناہ لینے پر مجبور ہیں، اس وقت میری تمام تر توانائیاں سیلاب زدگان کی بحالی پر مرکوز ہیں۔

(جاری ہے)

سردار سلیم حیدر نے کہا کہ روزانہ کی بنیاد پر سیلاب سے متاثرہ خاندانوں کو 3 وقت کا کھانا مہیا کیا جائے گا، ریڈکریسنٹ کی جانب سے میڈیکل کیمپس لگائے جائیں گے۔دکھ کی اس گھڑی میں ہر ممکن مدد فراہم کی جائے گی، یہ وقت کسی قسم کی سیاست کا نہیں، سیاست سے بالاتر ہو کر سیلاب متاثرین کی مدد کرنی ہو گی۔ موہلنوال میں سیلاب متاثرین کو خیمے لگا کر دیں گے۔سیلاب متاثرین نے گورنر پنجاب سے شکوہ کیا کہ ہماری مدد کے لیے کوئی نہیں پہنچا، کسی قسم کی سرکاری مدد، رہائشی خیمے، کھانا، طبی سہولتیں فراہم نہیں کی گئیں، اپنی مدد آپ کے تحت سیلاب سے اپنی جانیں بچائیں۔