اے آئی سے خواتین کی ملازمتوں کو زیادہ خطرہ ہے، اقوام متحدہ کی رپورٹ

بدھ 21 مئی 2025 23:11

نیو یارک (اُردو پوائنٹ اخبارتازہ ترین - آن لائن۔ 21 مئی2025ء)ایک نئی رپورٹ میں انکشاف کیا گیا ہے کہ مصنوعی ذہانت (اے آئی) کی تیزرفتار ترقی کے باعث خواتین کی ملازمتیں مردوں کے مقابلے میں زیادہ خطرے سے دوچار ہیں۔ اقوام متحدہ کے ذیلی ادارے انٹرنیشنل لیبر آرگنائزیشن (ILO) کی حالیہ رپورٹ کے مطابق، اے آئی کے باعث سب سے زیادہ اثر ان ملازمتوں پر پڑے گا جو عموماً خواتین انجام دیتی ہیں۔

رپورٹ کے مطابق ترقی یافتہ اور امیر ممالک میں یہ خطرہ زیادہ شدید ہے جہاں خواتین کی تقریباً 9.6 فیصد ملازمتیں ایسی ہیں جن میں اے آئی کی وجہ سے نمایاں تبدیلی یا خطرہ متوقع ہے۔ اس کے مقابلے میں مردوں کی صرف 3.5 فیصد ملازمتیں متاثر ہونے کا امکان ہے۔رپورٹ میں مزید کہا گیا ہے کہ اگرچہ اے آئی تمام ملازمتوں کو فوری طور پر ختم نہیں کرے گی لیکن بہت سی ملازمتوں کے اندرونی کام یا فرائض بدل سکتے ہیں۔

(جاری ہے)

خاص طور پر میڈیا، دفتری، سافٹ ویئر، اور فنانس جیسے شعبے اے آئی سے سب سے زیادہ متاثر ہو رہے ہیں۔رپورٹ میں واضح کیا گیا ہے کہ یہ تبدیلی مکمل خودکار نظام کے نفاذ کا مطلب نہیں بلکہ صرف یہ کہ کئی کام اب اے آئی کے ذریعے انجام دیے جا سکتے ہیں۔ اس کا مطلب یہ ہے کہ انسانوں کی ضرورت برقرار رہے گی لیکن ان کے کام کی نوعیت میں تبدیلی آئے گی۔

دوسری جانب کچھ ماہرین کا کہنا ہے کہ اے آئی انسانوں کی جگہ لینے کے بجائے ان کے کام کو مؤثر بنائے گی اور پیداواری صلاحیت میں اضافہ کرے گی، جس سے نئی ملازمتوں کے مواقع بھی پیدا ہوں گے اور اقتصادی ترقی کو فروغ ملے گا۔یہ بحث ابھی جاری ہے کہ مستقبل میں اے آئی انسانی ملازمتوں کو کس حد تک متاثر کرے گی لیکن موجودہ اعداد و شمار اس بات کی نشاندہی کر رہے ہیں کہ خواتین کو اس حوالے سے زیادہ محتاط رہنے کی ضرورت ہے۔

Facebook Twitter Google + Share on Whatsapp

اے آئی سے خواتین کی ملازمتوں کو زیادہ خطرہ ہے، اقوام متحدہ کی رپورٹ

متعلقہ عنوان :

مزید بین الاقوامی خبریں