Live Updates

سب لوگ قیادت کے کمپرومائز ہونے کا واویلا کر رہے ہیں حقیقت یہ ہے کہ قیادت بد نیتی پر فیصلے کر رہی ہے، شیر افضل مروت

رکن قومی اسمبلی کی پی ٹی آئی کی موجودہ قیادت اور صوبائی قیادت پر شدید تنقید، ہم عدالتوں کے چکر لگاتے لگاتے تھک چکے ہیں مگر صوبائی حکومت کا حال یہ ہے کہ کسی فیصلے پر نہیں پہنچتی، عدالت کے باہر میڈیا سے گفتگو

فیصل علوی جمعرات 22 مئی 2025 12:50

سب لوگ قیادت کے کمپرومائز ہونے کا واویلا کر رہے ہیں حقیقت یہ ہے کہ قیادت ..

پشاور(اردوپوائنٹ اخبار تازہ ترین۔22 مئی 2025)رکن قومی اسمبلی شیر افضل مروت کا کہنا ہے کہ سب لوگ قیادت کے کمپرومائز ہونے کا واویلا کر رہے ہیں مگر حقیقت یہ ہے کہ قیادت بد نیتی پر فیصلے کر رہی ہے، شیر افضل مروت کی پی ٹی آئی کی موجودہ قیادت اور صوبائی قیادت پر شدید تنقید، پشاور ہائیکورٹ کے باہر میڈیا سے گفتگو کرتے ہوئے انہوں نے کہا کہ ہم عدالتوں کے چکر لگاتے لگاتے تھک چکے ہیں مگر صوبائی حکومت کا حال یہ ہے کہ کسی فیصلے پر نہیں پہنچتی صرف کیسز چل رہے ہیں۔

نااہل اور بزدل لوگوں کو پارٹی کی باگ ڈور دی گئی ہے یہی وجہ ہے کہ ہمارے تمام احتجاجی اقدامات ناکامی کا شکار ہوئے۔ شیرافضل مروت نے خیبرپختونخوا ہ حکومت کو سخت تنقید کا نشانہ بناتے ہوئے کہا کہ صوبائی حکومت کی ہر طرف کوتاہی ہی کوتاہی ہے۔

(جاری ہے)

ایڈووکیٹ جنرل خیبرپختونخوا ہ کو اس صورتحال پر سنجیدگی سے سوچنا چاہیے۔ان کا کہنا تھا کہ ہم ڈیڑھ سال سے ہائی کورٹ کے چکر کاٹ رہے ہیں مگر ضمانتیں نہیں ہو رہی ہیں۔

شیر افضل مروت نے پی ٹی آئی چیئرمین پر بھی شدید تحفظات کا اظہار کیا۔ پی ٹی آئی چیئرمین نے پارلیمانی کمیٹی کی بے توقیری کی ہے۔ انہوں نے جو الزامات لگائے ہیں ان پر آرمی چیف کو نوٹس لینا چاہیے۔ ایسے افراد پی ٹی اے کے چیئرمین جیسے اہم عہدے کیلئے نااہل ہیں۔شیر افضل مروت نے ایمل ولی خان کے موقف کی حمایت کرتے ہوئے کہا کہ ایمل ولی کے ساتھ ذاتی اختلافات اپنی جگہ لیکن چیرمین پی ٹی اے کو عہدے سے ہٹانے کے ان کے مطالبے کی مکمل تائید کرتا ہوں۔

شیر افضل مروت نے گفتگو کرتے ہوئے مزید کہا کہ بانی پی ٹی آئی کی رہائی کیلئے احتجاجی تحریک صرف اہل قیادت ہی چلا سکتی ہے یہ موجودہ قیادت کے بس کی بات نہیں۔واضح رہے کہ اس سے قبل بھی رکن قومی اسمبلی شیر افضل مروت کا کہنا تھا کہ اب تو میں پارٹی سے نکالا جا چکا تھا میرے بیانات کو متنازع نہ کہیں۔پی ٹی آئی کو ایسا تاثر نہیں دینا چاہیے کہ پارٹی میں انتشار تھا۔

تحریک انصاف میں اختلافات ہیں اور یہ اختلافات دن بدن بڑھتے جا رہے تھے۔جیو نیوز سے گفتگو کرتے ہوئے رکن قومی اسمبلی کاکہنا تھا کہ پی ٹی آئی کی صوبائی اور مرکزی قیادت میں اختلافات پیدا کرنے کےلئے مائنز اینڈ منرلز بل کو متنازع بنایا گیا تھا۔وزیراعلیٰ خیبر پختونخوا ہ علی امین گنڈا پورپہلے ہی کہہ چکے ہیں کہ سوال ہی پیدا نہیں ہوتا کہ صوبہ مرکز کو اپنا حق دے۔ایک سوال کے جواب میں شیر افضل مروت کا یہ بھی کہنا تھا کہ جب بھی پارٹی کو ضرورت پڑی یا بانی پی ٹی آئی نے بلایا تو جاوں گا۔بانی پی ٹی آئی عمران خان سے ملنے کی دیر ہے سب کچھ ٹھیک ہو جائے گا۔