ٹنڈوآدم میں وفاقی محتسب کے زیر اہتمام کھلی کچہری، عوامی شکایات پر فوری کارروائی

جمعرات 22 مئی 2025 17:09

حیدرآباد (اُردو پوائنٹ اخبارتازہ ترین - اے پی پی۔ 22 مئی2025ء) وفاقی محتسب ریجنل آفس میرپورخاص کے ایسوسی ایٹ ایڈوائزر انجینئر محمد عارف کی جانب سے ٹنڈوآدم میں عوامی آگاہی اور شکایات کے ازالے کے لیے کھلی کچہری کا انعقاد کیا گیا۔ کھلی کچہری میں شہریوں نے حیسکو، سوئی سدرن گیس، نادرا اور دیگر وفاقی اداروں کے خلاف مختلف شکایات پیش کیں، جن میں سے کئی شکایات پر موقع پر ہی کارروائی عمل میں لائی گئی جبکہ بعض معاملات میں متعلقہ افسران اور درخواست گزاروں کو دفتر طلب کیا گیا ہے۔

اس موقع پر اے پی پی سے بات چیت کرتے ہوئے انجینئر محمد عارف نے کہا کہ وفاقی محتسب کا ادارہ عوامی مسائل کے حل کے لیے ہر ممکن اقدامات کر رہا ہے۔ اگر کسی شہری کو کسی وفاقی ادارے سے شکایت ہو تو وہ سادہ کاغذ پر درخواست لکھ کر اپنی شکایت درج کروا سکتا ہے، جس پر بلا معاوضہ فوری کارروائی کی جائے گی۔

(جاری ہے)

کھلی کچہری میں اسسٹنٹ کمشنر ٹنڈوآدم حنین طارق شاہانی، ایکسیئن حیسکو غیاث الدین شیخ، آر او آفیسر حیسکو آصف علی چنہ، انچارج سوئی سدرن گیس سید حبدار علی شاہ، ڈی ایس پی ٹنڈوآدم عبدالستار گرگیج، انچارج نادرا شاہد حسین ہالیپوٹو، اسسٹنٹ ڈائریکٹر بینظیر انکم سپورٹ پروگرام فیصل گجر اور وائس چیئرمین میونسپل کمیٹی ٹنڈوآدم ملک ذوالفقار سمیت دیگر اداروں کے افسران اور شہریوں کی بڑی تعداد موجود تھی۔