گورنرخیبرپختونخوا کی وفاقی وزیر داخلہ سید محسن نقوی سے ملاقات

خیبرپختونخوا میں امن و امان کی صورتحال، طورخم اور تفتان بارڈرز پر درپیش عوامی و تجارتی مسائل سمیت سی پیک سیکیورٹی سے متعلق امور پر تفصیلی تبادلہ خیال

جمعہ 23 مئی 2025 22:45

گورنرخیبرپختونخوا کی وفاقی وزیر داخلہ سید محسن نقوی سے ملاقات

پشاور(اُردو پوائنٹ اخبارتازہ ترین - این این آئی۔ 23 مئی2025ء)گورنر خیبرپختونخوا فیصل کریم کنڈی نے جمعہ کووفاقی وزیر داخلہ سید محسن رضا نقوی سے اسلام آباد میں ملاقات کی۔ملاقات میں خیبرپختونخوا میں امن و امان کی صورتحال، طورخم اور تفتان بارڈرز پر درپیش عوامی و تجارتی مسائل سمیت سی پیک سیکیورٹی سے متعلق امور پر تفصیلی تبادلہ خیال کیا گیا۔

ملاقات کے دوران گورنر نے خیبرپختونخوا بالخصوص سی پیک پر ڈیرہ کی حدود میں بدامنی اور اغواء کی وارداتوں پر تشویش کا اظہار کیا۔ انہوں نے وفاقی وزیر کو بتایا کہ ان واقعات سے نہ صرف سیکیورٹی خدشات بڑھ رہے ہیں بلکہ ترقیاتی کاموں میں بھی رکاوٹیں پیدا ہو رہی ہیں، گورنر نے طورخم بارڈر پر تاجروں اور عام شہریوں کو درپیش مسائل، اور تفتان بارڈر پر زائرین کی مشکلات سے پر روشنی ڈالی۔

(جاری ہے)

انہوں نے کہا کہ یہ دونوں مقامات قومی و علاقائی اہمیت کے حامل ہیں اور ان پر بہتر سہولیات اور سیکیورٹی کی فراہمی ناگزیر ہے۔وفاقی وزیر داخلہ سید محسن نقوی نے یقین دہانی کرائی کہ سی پیک کے تحفظ کو یقینی بنانے کے لیے مؤثر اقدامات کیے جا رہے ہیں، اور طورخم و تفتان بارڈرز پر تاجروں و زائرین کو درپیش مسائل کے فوری حل کو ترجیحات میں شامل کیا گیا ہے۔ انہوں نے زائرین کے لیے سہولیات کی فراہمی کو ترجیحی بنیادوں پر حل کرنے کا عزم ظاہر کیا۔اس موقع پر وزیر داخلہ نے گورنر کی درخواست پر پہاڑ پور تحصیل میں پاسپورٹ دفتر کے قیام کے لیے بھی فوری اقدامات کی یقین دہانی کرائی۔