وفاقی وزیرتجارت جام کمال خان کی زیر صدارت ایکسپورٹ ڈویلپمنٹ فنڈ کے بورڈ کا اجلاس

اسلام آباد (اُردو پوائنٹ اخبارتازہ ترین - اے پی پی۔ 22 مئی2025ء) ایکسپورٹ ڈویلپمنٹ فنڈ کے بورڈ کا اجلاس جمعرات کو وفاقی وزیر تجارت جام کمال خان کی زیر صدارت منعقد ہوا ۔ اجلاس میں ایف سی ڈی او کے مالی تعاون سے چلنے والے “ریمیٹ پروجیکٹ” کی تیار کردہ رپورٹ پر غور کیا گیا۔اجلاس میں ریمیٹ ٹیم نے بورڈ کو ایک تفصیلی پریزنٹیشن دی جس میں حکمتِ عملی کی تیاری کے لئے اختیار کردہ طریقہ کار کو واضح کیا گیا جس میں عالمی بہترین پریکٹسز کا مطالعہ، سٹیک ہولڈرز سے مشاورت اور ان مسائل کا تجزیہ شامل تھا جن کی وجہ سے ای ڈی ایف برآمدات کے فروغ میں گیم چینجر ثابت نہ ہو سکا۔

پریزنٹیشن میں پاکستان کی برآمدی صورتحال اور وہ عوامل بھی شامل تھے جن کی وجہ سے ملک چند مخصوص مصنوعات اور مارکیٹوں تک محدود رہا ہے۔

(جاری ہے)

ٹیم نے سٹیک ہولڈرز کی مشاورت کے بعد وضع کئے گئے وژن، مشن اور سٹریٹجک اہداف پیش کئے جن میں سفارش کی گئی کہ ای ڈی ایف موجودہ اور نئے برآمد کنندگان کو مارکیٹ تک رسائی، جدت طرازی کے فروغ، اور جامع و پائیدار ترقی کے لیے تکنیکی اور مالی معاونت فراہم کرے گا۔

اہداف کے حصول کے لئے ای ڈی ایف کو ایک پیشہ وارانہ طرز پر چلنے والے اور مؤثر نظام کے تحت چلنے والے ادارے میں تبدیل کرنے کی تجویز دی گئی جس میں نیٹ ورکس اور اتحاد بھی قائم کئے جائیں گے۔ماہرین نے 13 مالیاتی سہولتوں (فنانسنگ ونڈوز)کے قیام کی سفارش کی، جو انفرادی اداروں کی ترقی، عالمی معیار کی مطابقت، مارکیٹنگ انٹیلی جنس، لیبر پروڈکٹیویٹی، برانڈنگ، مارکیٹ تک رسائی، سپلائی چین ڈھانچے، ایکسپورٹ کریڈٹ/انشورنس وغیرہ جیسے شعبوں پر مرکوز ہوں گی۔

اسی طرح، نئی مصنوعات اور مارکیٹوں کے لیے ایک چیلنج فنڈ قائم کرنے کی تجویز بھی دی گئی۔ریمیٹ ٹیم نے ای ڈی ایف ایکٹ کے قانونی جائزے، داخلی ڈھانچے میں اصلاحات، فنانسنگ ونڈوز کے قیام، فریم ورک معاہدوں، اور مانیٹرنگ و ایویلیوایشن سسٹمز پر مشتمل تبدیلی کا منصوبہ بھی پیش کیا۔بورڈ کے اراکین نے ٹیم کی کوششوں کو سراہا اور سفارشات پر تفصیل سے تبادلہ خیال کیا۔

بورڈ نے فنڈ کی کارپوریٹائزیشن اور اس کے طویل مدتی اثرات پر بھی غور کیا کہ یہ پاکستان کی برآمدی حکمت عملی پر کیا اثر ڈالے گا۔ اجلاس میں اس بات پر اتفاق کیا گیا کہ شواہد پر مبنی فیصلہ سازی کے لئے ایک پیشہ ورانہ طور پر چلنے والے ادارے کی ضرورت ہے۔اجلاس میں فیصلہ کیا گیا کہ ای ڈی ایف ایکٹ کا قانونی جائزہ لینے کے لیے ایک قانونی ماہر کو شامل کیا جائے گا، جب کہ بورڈ کے چار نجی اور دو سرکاری اراکین پر مشتمل کمیٹی آئندہ کے لائحہ عمل پر سفارشات پیش کرے گی۔