یونیورسٹی آف سرگودھا کےزیرِ اہتمام ریسرچ پروڈکٹوٹی ایوارڈز کی تقریب منعقد، 176 فیکلٹی ممبران کو ریسرچ ایوارڈ سے نوازا گیا

سرگودھا (اُردو پوائنٹ اخبارتازہ ترین - اے پی پی۔ 22 مئی2025ء) یونیورسٹی آف سرگودھا نے گزشتہ ایک سال کے دوران معیاری تحقیقی کام کرنے والے 176 فیکلٹی ممبران کو ریسرچ ایوارڈ سے نواز ا جبکہ ان فیکلٹی ممبران کو مجموعی طور پر تقریباً دو کروڑ روپے کی انعامی رقم سے بھی نوازا گیا۔ ریسرچ پروڈکٹوٹی ایوارڈ کی تقریب ملک فیروز خان نون بزنس سکول میں منعقد ہوئی جس میں محققین کو ان کی خدمات پر خراجِ تحسین پیش کیا گیا۔

تقریب میں سیکرٹری ہائر ایجوکیشن ڈیپارٹمنٹ پنجاب ڈاکٹر فرخ نوید بطور مہمان خصوصی جبکہ وائس چانسلر پروفیسر ڈاکٹر قیصرعباس مہمانِ اعزاز کے طورپرشریک ہوئے۔تقریب میں ڈائریکٹر اورِک پروفیسر ڈاکٹر احمد رضا بلال، یونیورسٹی کے ڈینز، ڈائریکٹرز، چیئرپرسنز اور دیگر محققین بھی شریک ہوئے۔

(جاری ہے)

اس موقع پر خطاب کرتے ہوئے ڈاکٹر فرخ نوید نے کہا کہ معیاری تحقیق جدت اور ادارہ جاتی ترقی کی بنیاد ہے، اور محققین کو خراجِ تحسین پیش کرنا ان کی کاوشوں کی قدر دانی کے ساتھ ساتھ آئندہ نسلوں کو علمی برتری کے حصول کی ترغیب بھی دیتا ہے۔

انہوں نے اورِک یونیورسٹی آف سرگودھا کی شاندار کارکردگی کو سراہتے ہوئے کہا کہ یہ دوسرے اداروں کے لیے ایک مثال ہے۔ مزید برآں، انہوں نے صوبے بھر کے اورِک دفاتر کے لیے ایک خصوصی تربیتی فورم کے قیام کا اعلان کیا جس کی میزبانی یونیورسٹی آف سرگودھا کے پاس ہو گی۔ڈاکٹر فرخ نوید نے پروفیسر ڈاکٹر قیصر عباس کو تحقیق کے فروغ اور تعلیمی معیار کی بلند رکھنے میں ان کی کاوشوں پر بھی سراہا اور کہا کہ اگر یونیورسٹی آف سرگودھا اسی جذبے سے اپنی تحقیقی سرگرمیاں جاری رکھے تو مستقبل قریب میں پاکستان کی ''ڈبلیو'' کیٹیگری یونیورسٹیوں میں اپنا نام شامل کروا سکتی ہے۔

وائس چانسلر پروفیسر ڈاکٹر قیصر عباس نے محققین کی قابلِ تعریف کامیابیوں کو سراہتے ہوئے کہا کہ معیاری تحقیقی ماحول تعلیمی معیار کی بڑھوتری، عالمی مقابلہ آرائی اور جامعہ کی سٹریٹجک ترقی کے لیے بنیادی حیثیت رکھتا ہے۔انہوں نے بتایا کہ ہماری یونیورسٹی نے اس سال 1500 اعلیٰ معیار کے تحقیقی مقالے شائع کیے، 40 سے زائد دانشورانہ املاک کے حقوق بشمول پیٹنٹس اور ٹریڈ مارکس جمع کروائے، 80 پالیسی پیپرز تیار کیے، 350 ریسرچ پراجیکٹس جمع کرائے اور 141 تحقیقی پراجیکٹس میں کامیابی حاصل کی۔

انہوں نے بتایا کہ یونیورسٹی آف سرگودھا نے محدود وقت میں معیاری تحقیق کے ذریعے فقید المثال کامیابیاں سمیٹیں جس کی بدولت ہائر ایجوکیشن کمیشن نے سرگودھا یونیورسٹی کو ایکس کیٹیگری سے نواز جبکہ اس سال کا ڈیٹا ہائر ایجوکیشن کو جمع کروانے کے بعد ہمارا ہدف یہ ہے کہ سرگودھا یونیورسٹی کو ڈبلیو کیٹیگری دلوائی جائے۔وائس چانسلر نے بتایا کہ طلبہ کو ہنر مند بنانے اور اُن کے بزنس آئیڈیاز کو فروغ دینے کے لیے وحید وائیں انکیوبیشن سنٹر قائم کیا گیا جہاں ان کے بزنس آئیڈیاز کو مارکیٹ میں متعارف کروانے کے لیے کام کیا جا رہا ہے، اسی طرح یونیورسٹی آف سرگودھا کے پیٹنٹس کو انٹرنیشنلائز کرنے کے لیے بھی عملی اقدامات کر رہے ہیں۔