وزیراعلی پنجاب مریم نواز شریف کا تجاوزات سے پاک صاف ستھرا پنجاب کا خواب شرمندہ تعبیر نہ ہوسکا

ننکانہ صاحب(اُردو پوائنٹ اخبارتازہ ترین - این این آئی۔ 25 مئی2025ء)سانگلہ ہل کروڑوں روپوں کی سرکاری اراضیوں پر با اثر تگڑے قبضہ مافیا نے متعلقہ محکموں کی مبینہ ملی بھگت کے باعث قبضہ کر لیا۔ رپورٹ کے مطابق گورنمنٹ بوائز ہائی سکول سانگلہ ہل کی 21کینال 16مرلہ جگہ جس میں سے سکول کو صرف 7کینال 2مرلے جگہ نصیب ہے جس کی وجہ سے سکول کے بچے کھیل کود سے محروم ہیں سکول کی14کینال14مرلے اراضی پر عرصہ دراز سے مافیا کا قبضہ برقرار،مافیا نے قبضہ کر کے گھر اور پختہ دوکانیں تعمیر کر لیں۔

کئی بار سکول انتظامیہ نے وزیر اعلی پنجاب اور محکمہ تعلیم کو قبضہ مافیا کے خلاف کاروائی کی اپیل کی مگر ہر دور حکومت میں سکول کی جگہ قبضہ مافیا سے واگزار نہ ہوسکی انتظامیہ بااثر تگڑے قبضہ مافیا سے جگہ واگزار کرانے سے گریزاں ہے۔

(جاری ہے)

اسی طرح سانگلہ ہل علی ہسپتال سے لے کرشرقی پھاٹک ریلوے تک سالوں پہلے ایک نالہ ہوا کرتا تھا جس کی11فٹ جگہ پر بھی قبضہ مافیا نے پختہ تعمیرات کی ہوئیں ہیں جبکہ یہ سڑک علی ہسپتال سے لے کرشرقی پھاٹک تک بہت تنگ ہے اور ٹی ایچ کیو ہسپتال سانگلہ ہل اور اے سی آفس سمیت دیگر سرکاری دفاترمیں اسی سڑک سے ہوکر جانا پڑتا ہے سڑک تنگ ہونے کی وجہ سے ٹریفک کی روانگی میں شدید مشکلات کا سامنا ہے۔

اہل علاقہ نے اربابِ اختیار سے اس سڑک پر واقع سرکاری زمین وزگزار کروا کر روڈ کو کشادہ کرنے کا مطالبہ کیا ہے۔مزیدبرآں۔دوسری طرف مافیا نے قبرستانوں کو بھی معاف نہ کیا پرانی کچہری کے قریب لاوارث قبرستان پر بھی بااثر مافیا نے قبریں مسمار کر کے کوٹھیاں تعمیر کرلیں اور مرکزی عید گاہ کے قبرستان پر بھی عرصہ دراز سے بااثر افراد نے قبضہ کر کے اپنے گھر اور ہسپتال تعمیر کر لیے ہیں،حسین ٹرسٹ ہسپتال سانگلہ ہل کے بااثر مالکان نے گزشتہ کئی دہائیوں سے کئی کینال قبرستان کی جگہ پرقبضہ جما رکھا ہے۔

مزیدبرآں۔ گورمے بیکری کے ساتھ چھوٹے فواروں کے ساتھ بھی تقریبا3مرلہ جگہ پر با اثر قبضہ مافیا نے پختہ تعمیرات کر رکھی ہیں۔ قبضہ مافیا کو سرکاری افسران اور مقامی سیاستدانوں کی پشت پناہی حاصل ہے۔ بااثر مافیا ہر آنے والے مقامی اور ضلعی آفیسر کی اچھی خاصی خاطر تواضع کر کے انہیں اپنی مٹھی میں کر لیا جاتا ہے جس کے باعث ان جگہوں کو مافیا سے واگزار کروانا پنجاب حکومت کیلئے ایک چیلنج نظر آرہا ہے۔

مزید برآں۔رپورٹ کے مطابق انتظامیہ کی طرف سے کیے جانے والے تجاوزات کے خلاف آپریشن کو مقامی عوامی سماجی حلقوں نے من پسند آپریشن اور فوٹو سیشن قرار دیتے ہوئے شدید الفاظ میں مذمت کی ہے۔ جبکہ عوامی، سماجی حلقوں کے افراد نے وزیر اعلی پنجاب مریم نواز شریف،کمشنر لاہوراور ڈپٹی کمشنر ننکانہ سے سانگلہ ہل سمیت ضلع بھر میں موجود مذکورہ و دیگر سرکاری اراضیوں کو با اثر قبضہ مافیا سے واگزار کروانے کا مطالبہ کیا ہے کہ ان سرکاری جگہوں کو قبضہ مافیا سے واگزار کروایا جائے تاکہ پنجاب حکومت کا خواب تجاوزات سے پاک صاف ستھرا پنجاب کے نعرے کو عملی جامہ پہنایا جاسکے۔