زندگی کو امام حسین ؓکی تعلیمات کے مطابق ڈھالنا ہی حقیقی کامیابی ہے،گورنر سندھ

کامران خان ٹیسوری کی چہلم امام حسینؓ کے جلوس میں شرکت، مذہبی ہم آہنگی اور عقیدت کا مظاہرہ

جمعہ 15 اگست 2025 22:29

زندگی کو امام حسین ؓکی تعلیمات کے مطابق ڈھالنا ہی حقیقی کامیابی ہے،گورنر ..

کراچی(اُردو پوائنٹ اخبارتازہ ترین - این این آئی۔ 15 اگست2025ء)گورنر سندھ کامران خان ٹیسوری نے چہلم امام حسینؓ کے موقع پر کراچی میں نکالے گئے مرکزی جلوس میں شرکت کی اور عزاداروں کے ساتھ یکجہتی کا اظہار کیا۔ گورنر سندھ کامران خان ٹیسوری نے عزاداروں کے ہمراہ چہلم امام حسینؓ کے مرکزی جلوس کی قیادت کی۔ اس موقع پر ایم کیو ایم پاکستان کے سینئر رہنما ڈاکٹر فاروق ستار بھی موجود تھے۔

(جاری ہے)

گورنر سندھ کامران خان ٹیسوری جلوسِ چہلم میں عزاداروں کے ساتھ نہ صرف شریک رہے بلکہ عزاداروں میں اپنے ہاتھوں سے شربت، چائے اور بریانی بھی تقسیم کی۔ جلوس میں شرکت کے بعد میڈیا سے گفتگو کرتے ہوئے گورنر سندھ نے امام حسینؓ کی عظیم قربانی کو انسانیت کے لیے مشعلِ راہ قرار دیا۔ انہوں نے کہا کہ امام حسینؓ نے حق کے راستے میں باطل کے سامنے سر نہیں جھکایا۔ ان کی قربانی رہتی دنیا تک امن، اتحاد اور بھائی چارے کا پیغام دیتی رہے گی۔ گورنر سندھ نے کہا کہ زندگی کو امام حسین کی تعلیمات کے مطابق ڈھالنا ہی حقیقی کامیابی ہے۔