Live Updates

حکومت تاجروں پر نئے ٹیکسز کے اطلاق سے قبل پیشگی مشاورت کرے ‘ اشرف بھٹی

تاجر ڈائریکٹ ، ان ڈائریکٹ کئی طرح کے ٹیکس دے رہے ہیں ‘ صدر آل پاکستان انجمن تاجران

اتوار 25 مئی 2025 12:55

لاہور(اُردو پوائنٹ اخبارتازہ ترین - این این آئی۔ 25 مئی2025ء)آل پاکستان انجمن تاجران کے مرکزی صدر اشرف بھٹی نے کہا ہے کہ حکومت تاجروں پر کسی طرح کے نئے ٹیکسز کا اطلاق سے قبل پیشگی مشاورت شروع کرے ، تاجروں نے کبھی ٹیکس دینے سے انکار نہیں کیا بلکہ ملک بھر میں تاجر مختلف ٹیکسز کی ادائیگی کے ساتھ لاکھوں لوگوں کو روزگار بھی فراہم کررہے ہیں۔

(جاری ہے)

اپنے بیان میں اشرف بھٹی نے کہا کہ یہ کہنا قطعا ً مناسب نہیں کہ سارے تاجر ٹیکسوں کی ادائیگی نہیں کرتے ، ہم برملا کہتے ہیں کہ تمام تاجروں کو اپنے ذمے ٹیکسز کی ادائیگی کرنی چاہیے لیکن حکومت بھی ٹیکسز کی تعداد اور شرح کو کم کرے ۔

انہوںنے کہا کہ تاجر ڈائریکٹ اور ان ڈائریکٹ کئی طرح کے ٹیکسز کی ادائیگی کر رہے ہیں ، ہم تجویز دے چکے ہیں کہ مارکیٹوں میں سروے میں تعاون کے لئے تیار ہیں لیکن تاجروں پر اتنا بوجھ نہ ڈالا جائے جسے وہ اٹھانے کے قابل نہ ہوں ۔ انہوں نے کہا کہ حکومت سے اپیل ہے کہ آئندہ مالی سال کے بجٹ میں تاجروں پر کسی طرح کے نئے ٹیکسز کے اطلاق سے قبل مشاورت کی جائے تاکہ بات چیت کے ذریعے مثبت پیشرفت ہو سکے اور حکومت کو کسی طرح کی مزاحمت کا سامنا نہ کرنا پڑے۔