سرگودھا، الٹرنیٹو ریسرچ انیشیٹیو کے زیر اہتمام سگریٹ نوشی کے مضر اثرات کے موضوع پر سیمینار کا انعقاد

پیر 26 مئی 2025 16:47

سرگودھا (اُردو پوائنٹ اخبارتازہ ترین - اے پی پی۔ 26 مئی2025ء) الٹرنیٹو ریسرچ انیشیٹیو کے زیر اہتمام سگریٹ نوشی کے مضر اثرات کے موضوع پر سرگودھا کے ایک مقامی ہوٹل میں ایک خصوصی سیمینار کا انعقاد کیا گیا ،جس میں بطور خاص نوجوان طلباء کو مدعو کیا گیا تھا تاکہ نوجوان نسل کو سگریٹ نوشی کے نقصانات سے آگاہی فراہم کی جاسکے اور ان کی کردار سازی کی جاسکے ۔

آلٹرنیٹو ریسرچ انیشیٹیو کے مرکزی نمائندگان جعفر حسین اور محمد جنید اس تقریب کے مہمان خصوصی تھے۔

(جاری ہے)

تقریب سے خطاب کرتے ہوئے جعفر حسین نے کہا کہ ملک سے سگریٹ نوشی کا خاتمہ ہماری اولین ترجیح ہے اور ہمیں اپنے نوجوانوں کو ہر حال میں اس لعنت سے دور رکھنا ہے ۔آلٹرنیٹو ریسرچ انیشیٹیو نوجوان نسل کو سگریٹ نوشی سے محفوظ رکھنے کیلئے دن رات کوشاں ہے ۔

تنظیم کے مقامی کوآرڈینیٹر ناصر گورائیہ نے اپنے خطاب میں کہا کہ سگریٹ نوشی انسانی صحت کیلئے انتہائی نقصان دہ عمل ہے جو کہ آہستہ آہستہ معاشرے کی جڑوں کو کھوکھلا کردیتا ہے۔تقریب میں شامل نوجوانوں نے بھی سگریٹ نوشی کے حوالے سے ذاتی تجربات و مشاہدات بیان کیے اور اپنے آپ کو اور ارد گرد کے ماحول کو سگریٹ نوشی سے پاک رکھنے کے عزم کا اظہار کیا۔