چیئرمین جوائنٹ چیفس آف اسٹاف کمیٹی جنرل ساحر شمشاد مرزا ،سروسز چیفس اور مسلح افواج کی وطن عزیز کے 27 ویں یوم تکبیر کے موقع پر پاکستانی عوام کو دلی مبارکباد

بدھ 28 مئی 2025 00:30

راولپنڈی (اُردو پوائنٹ اخبارتازہ ترین - اے پی پی۔ 28 مئی2025ء) چیئرمین جوائنٹ چیفس آف اسٹاف کمیٹی جنرل ساحر شمشاد مرزا ،سروسز چیفس اور مسلح افواج نےوطن عزیز کے 27 ویں یوم تکبیر کے موقع پر پاکستانی عوام کو دلی مبارکباد دی ہے۔آئی ایس پی آر سے جاری کردہ بیان میں کہا گیا ہے کہ یوم تکبیر اس اہم موقع کی یاد میں منایا جاتا ہے جب 1998ء میں پاکستان ایک جوہری طاقت کے طور پر ابھرا،پاکستان نے جنوبی ایشیا میں اسٹریٹجک توازن کو بحال کرتے ہوئے اپنے دفاع کے حق کا اظہار کیا،یہ تاریخی کامیابی قوم کے غیر متزلزل عزم، اتحاد اور امن بقائے باہمی کی غیر متزلزل جستجو کی مظہر ہے۔

پاکستان کی سٹریٹجک صلاحیت عوام کی مشترکہ امنگوں کی عکاس، قومی امانت ہے ۔یوم تکبیر قیادت کی دور اندیشی، سائنسدانوں اور انجینئروں کی محنت اور ملکی دفاع کو ناقابل تسخیر بنانے والے تمام لوگوں کی خدمات کو خراج تحسین ہے۔

(جاری ہے)

یہ دن اپنی خودمختاری اور علاقائی سالمیت کے تحفظ کے لیے پاکستان کے ثابت قدم عزم کو اجاگر کرتا ہے۔بیان میں یہ بھی کہا گیا ہے کہ یہ دن ہمارے قابل اعتبار کم از کم ڈیٹرنس کے نظریے کی توثیق کرتا ہے، پاکستان خطے میں امن اور اسٹریٹجک استحکام کو برقرار رکھنے کے اصول کا داعی ہے۔

پاکستان کی مسلح افواج تمام خطرات کے خلاف مادر وطن کے دفاع کے لیے اپنے غیر متزلزل عزم کا اعادہ کرتی ہیں۔پاکستان کی جوہری صلاحیت صرف اور صرف دفاعی مقاصد کے لئے ہے اور یہ امن کی ضامن ہے ۔مسلح افواج وطن کی سلامتی، ترقی اور خوشحالی کے لیے ہمہ وقت تیار اور پرعزم ہیں۔مسلح افواج اس سنگ میل کو ممکن بنانے کیلئے بے پناہ قربانیاں دینے والوں کے ساتھ کھڑی ہیں ۔بے پناہ قربانیاں دے کر ملکی قوت، استحکام اور خود انحصاری کا سفر جاری رکھنے والوں سے اظہار یکجہتی کرتے ہیں۔پاکستان زندہ باد۔