( کئی برسوں سے ملک میں بجلی کے بے تحاشا نرخ بڑھنے سے بل ادا کرنا صارفین کی ہمت سے باہر ہو چکے ہیں.‘سینیٹرعبدالقادر

جمعرات 29 مئی 2025 22:45

Xکوئٹہ(اُردو پوائنٹ اخبارتازہ ترین - آن لائن۔ 29 مئی2025ء)چیئرمین قائمہ کمیٹی برائے دفاعی پیداوار سینیٹر محمد عبدالقادر نے اپنے ایک خصوصی بیان میں کہا ہے کہ کمرشل بنکس اکانٹس کا پچاس فیصد پبلک کو لون دیں تاکہ ملک میں تعمیری اور کاروباری سرگرمیوں میں خاطر خواہ بہتری لائی جا سکی. اس کے علاوہ گزشتہ کئی برسوں سے ملک میں بجلی کے بے تحاشا نرخ بڑھنے سے بجلی کے بل ادا کرنا صارفین کی ہمت سے باہر ہو چکے ہیں.

بجلی کے ناقابل برداشت بلوں سے چھٹکارا پانے کیلئے لوگوں نے توانائی کے حصول کیلئے آئی پی پیز سے بجلی کے حصول کی بجائے سولر انرجی پر منتقل ہونے کا فیصلہ کیا.

(جاری ہے)

آئی پی پیز پچھلے 30 برس سے صارفین کا خون نچوڑ رہے ہیں اس لئے وہ چاہتے ہیں کہ سولر انرجی پر حکومت ٹیکسز اور ڈیوٹیوں پر چھوٹ ختم کر دے تاکہ صارفین کی سولر انرجی کے حصول کی حوصلہ شکنی ہو اور وہ ان آئی پی پیز سے مہنگی ترین بجلی لینے پر مجبور ہو جائیں.

چیئرمین قائمہ کمیٹی برائے دفاعی پیداوار نے مزید کہا ہے کہ حکومت عوام کو آئی پی پیز کے چنگل سے نجات دلائی. آئی پی پیز خوفناک مافیا کا روپ دھار چکے ہیں. حکومتوں پر براہ راست اثر انداز ہوتے ہوئے انہوں نے عوام کا جینا دوبھر کر دیا ہی. حکومت کو گھریلو اور کمرشل صارفین کے لئے سستی بجلی کا حصول ممکن بنانا ہوگا تاکہ عوام کی زندگیاں مزید اجیرن ہونے سے بچائی جا سکیں.

کاروباری حلقوں کو سستی بجلی کی فراہمی سے پیداواری اہداف حاصل کرنے میں کامیابی ہوگی جس سے ملکی معیشت کو سنبھالا ملے گا اور برآمدات میں خاطرخواہ اضافہ ہوگا. جو لوگ آئی پی پیز سے بجلی حاصل کرنے کی بجائے سولر انرجی پر منتقل ہونا چاہتے ہیں انکے لئے حکومتی سطح پر آسانیاں پیدا کی جائیں تاکہ صارفین کے بڑھتے ہوئے اخراجات میں کمی واقع ہو سکی.