وزیراعلیٰ خیبر پختونخوا کا ایک ماہ، کابینہ ارکان کی 15 دن کی تنخواہ سیلاب زدگان کو دینے کا اعلان

پیر 18 اگست 2025 23:05

پشاور(اُردو پوائنٹ اخبارتازہ ترین - این این آئی۔ 18 اگست2025ء)وزیراعلیٰ خیبرپختونخوا علی امین گنڈا پور نے صوبے کے سیلاب سے متاثرہ افراد کے لئے ایک ماہ اور کابینہ ارکان نے 15 دن کی تنخواہ عطیہ کرنے کا اعلان کردیا۔وزیر اعلیٰ خیبر پختونخوا علی امین گنڈاپور نے اپنی ایک ماہ کی تنخواہ سیلاب زدگان کی امداد کے لئے دینے کا اعلان کیا ہے۔صوبائی کابینہ اراکین نے 15 دنوں کی تنخواہیں جبکہ ممبران صوبائی اسمبلی کی 7 دنوں کی تنخواہوں متاثرین کی امداد کے لئے دینے کا فیصلہ کیا ہے۔

اسی طرح، اسکیل 17 اور اوپر کے ملازمین کی دو دنوں جبکہ اسکیل ایک سے 16 تک کے ملازمین کی ایک دن کی تنخواہ سیلاب زدگان کے لیے دی جائے گی۔وزیر اعلیٰ نے ان عطیات کے شفاف استعمال کے لئے بھی طریقہ کار وضع کرنے کا فیصلہ کیا ہے۔

(جاری ہے)

علی امین گنڈاپور کا کہنا ہے کہ اس مقصد کے لئے پی ڈی ایم اے میں ایک خصوصی اکاونٹ کھولا جائے گا، سیلاب زدگان کی امداد کے لئے اس فنڈ کے استعمال کے لئے ایک صاف اور شفاف طریقہ کار اپنایا جائے گا۔ فنڈ کی ایک ایک پائی کا حساب رکھا جائے گا اور اس کی تمام تفصیلات سے عوام کو آگاہ کیا جائے گا۔وزیراعلیٰ علی امین گنڈاپور نے کہا کہ سیلاب زدگان ہماری خصوصی توجہ اور تعاون کے مستحق ہیں، مشکل کی اس گھڑی میں ہم سب کو دل کھول کر متاثرین کی مدد کرنی چاہیے۔