yڈپٹی اسپیکر غزالہ گولہ کی صدارت میں بلوچستان اسمبلی کااجلاس

ؓکوئٹہ (اُردو پوائنٹ اخبارتازہ ترین - آن لائن۔ 31 مئی2025ء) بلوچستان اسمبلی کاڈپٹی اسپیکر غزالہ گولہ کی صدارت میں ہفتہ کو اپنے مقررہ وقت سے 3 منٹ کی تاخیر سے تلاوت کلام پاک سے شروع ہوا اجلاس میں چار مسودات قانون اور بی ایم سی کی پانچ سالہ آڈٹ رپورٹ پیش، اپوزیشن ارکان کا انہیں اہمیت نہ دینے اور سوالات کے جوابات نہ ملنے پر احتجاج، زابد ریکی نے عید کے بعد ریڈ زون کے باہر دھرنا دینے کا اعلان کر دیا۔

بلوچستان اسمبلی کے اجلاس میں نقطہ اعتراض پر اظہار خیال کرتے ہوئے حق دو تحریک کے رکن مولانا ہدایت الرحمن نے کہا کہ وزیر اعلی نے گزشتہ اجلاس میں کہا کہ وہ کسی کی بلیک میلنگ میں نہیں آئیں گے وزیر اعلی کسی بلیک میلنگ میں نہ آئیں لیکن ہمیں معلوم ہے کہ بلوچستان کے کس محکمے میں کیاہو رہاہے اپوزیشن بھی کسی کی بلیک میلنگ میں نہیں آئے گی، انہوں نے کہا کہ اپوزیش کی توہین نہ کی جائے،احتجاج کرناہمارا حق ہے کون کس کو کیسے بلیک میل کرتاہے معلوم ہے اس کا نام بھی بتاسکتاہوں۔

(جاری ہے)

اپوزیشن لیڈر میر یونس عزیز زہری نے کہا ہے کہ ایوان میں ہمارے سوالات کے جوابات نہیں دیئے جاتے ہیں سیکرٹریز میرے خطوط کے جوابات نہیں دیتے ہیں اگر سیکرٹریز سوالات کا جواب نہیں دیتے ہیں ہم آئندہ سوالات نہیں پوچھیں گے جس پر ڈپٹی اسپیکر نے کہا کہ سیکرٹریز سوالات کے جوابات کے دینے کے پابند ہیں۔ اجلاس میں نیشنل پارٹی کے رکن میر رحمت صالح بلوچ نے کہا کہ سانحہ سوراب سانحہ افسوس ناک ہے، پورا صوبہ ماتم کررہاہے۔

انہوں نے کہا کہ ایوان کے ممبرز کی کیا عزت ہے، کسی بھی پروگرام میں بلوایاجاتاہے تو وہاں ہمیں پانی تک نہیں ملتا۔ جمعیت علما اسلام کے رکن میر زابد علی ریکی نے کہا کہ ماشکیل میں سرحد تا حال بند ہے عیدکے بعد ریڈ روز میں دھرنادیں گے اور ہم نہیں اٹھیں گے انہوں نے کہا کہ بارڈر ٹریڈ کو بند نہ کیاجائے،اگر حکومت نوکری نہیں دے سکتی تو بارڈرتو کھول دے۔

اجلاس میں صوبائی وزیر صحت بخت محمد کاکڑ نے بلو چستان ہیلتھ انسٹیٹیوشن اصلاحات مسودہ قانون 2025، بلوچستان انسٹیٹیوٹ آف کارڈیو ویسکیو لر ڈیزیز مسودہ قانون 2025، انسٹیٹیوٹ آف چائلڈ ہیلتھ سروسز مسودہ قانون 2025، بلوچستان مٹرنل اینڈ پیرینیٹل ڈیت سرویلنس اینڈ رسپانس مسودہ قانون 2025 پیش کئے جنہیں ایوان نے متعلقہ کمیٹی کے سپرد کردیا۔ اجلاس میں پارلیمانی سیکرٹری میر زرین مگسی نے اسپیشل آڈٹ رپورٹ براکاونٹس آف بولان میڈیکل کمپلیکس ہسپتال کوئٹہ برائے مالی سال2017-18،2021-22آڈٹ سال2022-23ایوان میں پیش کی جسے ایوان نے پبلک اکائونٹس کمیٹی کے سپرد کردیا۔ بعدازاں ڈپٹی اسپیکر نے بلوچستان اسمبلی کا اجلاس 3 جون تک ملتوی کردیا۔