عید الاضحیٰ پر امارات میں کارکنوں کیلئے ملک گیر تقریبات کا اعلان

دبئی ( اُردو پوائنٹ اخبارتازہ ترین۔ 02 جون 2025ء ) عید الاضحیٰ پر متحدہ عرب امارات میں کارکنوں کیلئے ملک گیر تقریبات کا اعلان کردیا گیا۔ امارتی میڈیا کے مطابق متحدہ عرب امارات عید الاضحی کی تعطیلات کے دوران 10 مقامات پر کارکنوں کے لیے جشن کی تقریبات کا ایک سلسلہ منعقد کرے گا، جس کا عنوان "ہمارے کارکنوں کے ساتھ عید؛ مسرت اور خوشی" رکھا گیا ہے، وزارت برائے انسانی وسائل اور اماراتی (MoHRE) کے زیر اہتمام اہم وفاقی اور مقامی اداروں کے اشتراک سے اس اقدام کا مقصد کمیونٹی کے احساس کو فروغ دینا اور متحدہ عرب امارات کی ترقی میں کارکنوں کے تعاون کو خراج تحسین پیش کرنا ہے، اس دوران مختلف قسم کے تفریحی شوز، کھیلوں کے ٹورنامنٹ، مقابلے اور ایوارڈ کی تقریبات کا انعقاد کیا جائے گا۔

بتایا گیا ہے کہ وزارت برائے انسانی وسائل اور اماراتی نے اس حوالے سے ویب سائٹ 'eidaladha2025.ensure.ae' بھی لانچ کی ہے جس میں نجی شعبے کی کمپنیوں اور مزدوروں کی رہائش کی سہولیات کو مدعو کیا گیا ہے کہ وہ اپنے کارکنوں کو رجسٹر کریں اور جغرافیائی ترجیحات کی بنیاد پر ایونٹس کا انتخاب کریں تاکہ ان تقریبات میں کارکنوں کی شرکت اور ہم آہنگی کو یقینی بنایا جاسکے۔

(جاری ہے)

وزارت کے اسسٹنٹ انڈر سکریٹری برائے معائنہ اور تعمیل محسن علی النسی کا کہنا ہے کہ یہ تقریبات خاص طور پر قومی تعطیلات کے دوران کارکنوں کو قابل قدر خدمات پر ان کی اہمیت کا احساس دلانے کے ہمارے عزم کی عکاسی کرتی ہیں کیوں کہ ہمارے کارکن متحدہ عرب امارات کی جاری پیشرفت اور ہماری لیبر مارکیٹ کا ایک لازمی حصہ ہیں، یہ اقدامات کارکنوں اور وسیع تر کمیونٹی کے درمیان تعلقات کو مضبوط بنانے کے لیے وزارت کی لگن کی نشاندہی کرتے ہیں، کارکنوں میں شرکت اور خوشی کو فروغ دے کر ہم ان کے اطمینان اور لیبر مارکیٹ کی مجموعی صحت دونوں کو بڑھا رہے ہیں۔

معلوم ہوا ہے کہ وزارت برائے انسانی وسائل و اماراتی اور پارٹنر تنظیموں کے سینئر رہنما شرکاء کے ساتھ بات چیت کرنے اور متحدہ عرب امارات کے سماجی اور معاشی تانے بانے میں کارکنوں کی فلاح و بہبود اور پہچان کی اہمیت کو مزید تقویت دینے کے لیے مختلف ایونٹ سائٹس کا دورہ بھی کریں گے، یہ تقریبات وزارت داخلہ، وفاقی اتھارٹی برائے شناخت، شہریت، کسٹمز اور پورٹس سکیورٹی، ابوظہبی، دبئی اور شارجہ کی پولیس کمانڈز کے ساتھ ساتھ متعدد میونسپل اور سول ڈیفنس حکام کے تعاون سے منعقد کی جا رہی ہیں۔

بتایا جارہا ہے کہ ان تقریبات کے دیگر اسٹریٹجک شراکت داروں میں ابوظہبی پورٹس گروپ، دبئی میں رہائش اور غیر ملکی امور کا جنرل ڈائریکٹوریٹ، دبئی کی روڈز اینڈ ٹرانسپورٹ اتھارٹی (آر ٹی اے)، نیشنل ایمبولینس، دبئی کارپوریشن برائے ایمبولینس سروسز اور راس الخیمہ اکنامک زون (RAKEZ) شامل ہیں۔