شیخ ڈاکٹر ماہر المعیقلی عیدالاضحیٰ کے خطیب مقرر، مسجد الحرام میں نماز کی امامت کریں گے

پیر 2 جون 2025 20:40

مکہ مکرمہ (اُردو پوائنٹ اخبارتازہ ترین - اے پی پی۔ 02 جون2025ء) حرمین شریفین کے امور کی ذمہ دار صدارت نے اعلان کیا ہے کہ ممتاز عالم دین اور خطیب شیخ ڈاکٹر ماہر المعیقلی مسجد الحرام میں اس سال 1446 ہجری کی عیدالاضحیٰ کی نماز کی امامت اور خطبہ دیں گے۔شیخ ڈاکٹر ماہر المعیقلی عالم اسلام میں اپنے گہرے فقہی علم، خطابت کی مہارت اور دل موہ لینے والی قرات کے باعث بے حد احترام کی نگاہ سے دیکھے جاتے ہیں۔

ان کی تقرری ایک مرتبہ پھر اہم ذمہ داری کا اظہار ہے،گزشتہ برس وہ خطبۂ عرفہ کیلئے منتخب گئے تھے۔شیخ ماہر نے اپنی علمی زندگی کا آغاز مدینہ منورہ کے ٹیچرز کالج سے کیا، بعد ازاں 1425 ہجری (2004/2005) میں جامعہ اُم القریٰ کے کالج آف شریعہ سے امام احمد بن حنبلؒ کے فقہی مسائل پر مقالے کے ساتھ ماسٹرز کی ڈگری حاصل کی۔

(جاری ہے)

بعد ازاں 1434 ہجری (2012/2013) میں انہوں نے فقہ شافعی میں ڈاکٹریٹ کی ڈگری اعزاز کے ساتھ حاصل کی۔

ان کا تحقیقی مقالہ امام الشیرازی کی کتاب تحفۃ النبیہ شرح التنبیہ کی حدود اور عدالتی امور پر تحقیق و تصحیح پر مبنی تھا۔تعلیمی میدان میں وہ ابتدا میں ریاضی کے استاد اور پھر مکہ مکرمہ میں ایک سکول میں اسٹوڈنٹ ایڈوائزر کے طور پر خدمات انجام دیتے رہے۔ بعد ازاں وہ جامعہ اُم القریٰ کے کالج آف جوڈیشل اسٹڈیز میں اسسٹنٹ پروفیسر مقرر ہوئے، جہاں وہ بعد ازاں گریجویٹ اسٹڈیز اور سائنسی تحقیق کے وائس ڈین بھی رہے۔

نماز کی امامت کا سفر انہوں نے مکہ کے علاقے العوالی کی سعدی مسجد سے شروع کیا۔ رمضان المبارک 1426 اور 1427 ہجری میں انہیں مسجد نبویؐ میں نماز کی امامت کا شرف حاصل ہوا، جب کہ 1428 ہجری میں انہوں نے مسجد الحرام میں تراویح اور تہجد کی امامت کی اور اسی سال باقاعدہ مسجد الحرام کے امام مقرر کئے گئے، وہ تاحال اس منصب پر فائز ہیں۔شیخ ڈاکٹر ماہر المعیقلی کو قرآن مجید کے معروف قاریوں میں شمار کیا جاتا ہے۔ ان کی پرسوز قرات اور روح پرور آواز دنیا بھر میں کروڑوں مسلمانوں کے دلوں کو چھو لیتی ہے، متوقع ہے کہ اس سال عیدالاضحیٰ کے موقع پر ان کا خطبہ اور نماز کی امامت دنیا بھر کے ناظرین اور زائرین کی بڑی تعداد کو اپنی جانب متوجہ کرے گی۔