آر ڈی اے ٹاسک فورس نے پی آئی اے افسران کوآپریٹو ہاؤسنگ سکیم کے سائیٹ آفس کو سربمہر کر دیا، روڈ انفرسٹرکچر کو مسمار کر دیا

آر ڈی اے غیر قانونی ڈویلپمنٹ اور لے آؤٹ پلان کی خلاف ورزیوں کے خلاف کریک ڈاؤن جاری رکھے گا،ڈی جی کنزہ مرتضیٰ

پیر 2 جون 2025 21:50

راولپنڈی(اُردو پوائنٹ اخبارتازہ ترین - این این آئی۔ 02 جون2025ء) ڈویژنل انٹیلی جنس کمیٹی کی ہدایات کے بعد راولپنڈی ڈویلپمنٹ اتھارٹی کی ٹاسک فورس غیر قانونی تعمیرات اور غیر قانونی ہاؤسنگ سکیموں کے خلاف آپریشن جاری رکھے ہوے ہے۔ ترجمان آر ڈی اے کے مطابق، آر ڈی اے انفورسمنٹ سکواڈ نے موضع اڈیالہ تحصیل و ضلع راولپنڈی میں پی آئی اے آفیسرز کوآپریٹو ہاؤسنگ سکیم کو نشانہ بناتے ہوئے ایک اہم آپریشن کیا ہے۔

آپریشن کے نتیجے میں سائٹ کے دفاتر کو سیل کر دیا گیا اور اس ہاؤسنگ سکیم کے روڈ انفراسٹرکچر کو مسمار کر دیا گیا۔ کریک ڈاؤن کی نگرانی ڈائریکٹر جنرل کنزہ مرتضیٰ نے کی، جنہوں نے دھوکہ دہی کے طریقوں سے نمٹنے اور شہریوں کو استحصال سے بچانے کے لیے اس طرح کی کارروائیاں جاری رکھنے کی ضرورت پر زور دیا۔

(جاری ہے)

ڈی جی آر ڈی اے نے کہا کہ کمشنر راولپنڈی کی رہنمائی میں ہم غیر قانونی ہاؤسنگ سوسائٹیوں کے خاتمے کے لیے مضبوط انداز اپنانے کے لیے پرعزم ہیں۔

انہوں نے زور دے کر کہا کہ ہاؤسنگ سکیم مالکان کی جانب سے زمینوں پر ناجائز قبضوں سے متعلق عوامی شکایات کو سنجیدگی سے لیا جا رہا ہے اور زمینوں پر زبردستی قبضے میں ملوث افراد کے خلاف سخت کارروائی کی جائے گی۔ ڈی جی آرڈی اے نے شہریوں پر زور دیا کہ وہ کسی بھی خرید و فروخت سے قبل آرڈی اے کی ویب سائٹ www.rda.gop.pk پر منظور شدہ ہاؤسنگ اسکیموں کی فہرست ضرور چیک کریں تاکہ کسی ممکنہ نقصان سے بچا جا سکے۔ اس آپریشن میں سپرنٹنڈنٹ پلاننگ بلڈنگ و پلاننگ انسپکٹرز محمد طارق، عمران حسین اور دیگر اہم ٹیم اراکین شامل تھے، آپریشن تھانہ صدر بیرونی کے تعاون سے کیا گیا۔