پنجاب سیڈ کارپوریشن کے تمام سیل پوائنٹس ، ڈیلرز شاپس کو اپ گریڈ کرنے کا فیصلہ

ایم ڈی علی ارشد رانا کی زیر صدارت اجلاس ،مختلف اضلاع میں نئے خوشحالی سنٹرز قائم کرنے پر بھی اتفاق

منگل 3 جون 2025 18:45

لاہور (اُردو پوائنٹ اخبارتازہ ترین - این این آئی۔ 03 جون2025ء) پنجاب سیڈ کارپوریشن کے تمام سیل پوائنٹس اور ڈیلرز شاپس کو اپ گریڈ کرنے کا فیصلہ کر لیا گیا جبکہ مختلف اضلاع میں نئے خوشحالی سنٹرز قائم کرنے پر بھی اتفاق کیا گیا ہے ۔پنجاب سیڈ کارپوریشن کے منیجنگ ڈائریکٹر علی ارشد رانا کی زیرصدارت ہیڈ آفس میں ہفتہ وار جائزہ اجلاس منعقد ہوا جس میں ڈی ایم ڈی محبوب عالم، ڈائریکٹر پروسیسنگ شمشاد اصغر، ڈائریکٹر مارکیٹنگ سہیل عامر بخاری، ڈائریکٹر پروکیورمنٹ ملک اسحاق اعوان، ڈائریکٹر پبلک ریلیشنز شاہد قادر، پی ایس او ٹو منیجنگ ڈائریکٹر عامر سہیل بھٹی، پراجیکٹ ڈائریکٹر شابی حسن اور دیگر افسران نے شرکت کی۔

اجلاس میں فیصلہ کیا گیا کہ پنجاب سیڈ کارپوریشن کے تمام سیل پوائنٹس کو موجودہ تھیمز کے مطابق اپ گریڈ کیا جائے اور اس کو باقاعدہ پنجاب سیڈ کارپوریشن خوشحالی سنٹر کا نام دیا جائے گا۔

(جاری ہے)

اسی سلسلے میں اجلاس میں مختلف اضلاع میں نئے خوشحالی سنٹرز قائم کرنے پر اتفاق کیا گیا۔ جس کا باقاعدہ آغاز ضلع راجن پور سے کیا جائے گا۔ اجلاس میں یہ بھی فیصلہ کیا گیا کہ پنجاب سیڈ کارپوریشن سے وابستہ ڈیلرز شاپس کو بھی خوشحالی سنٹرز کی طرز پر اپ گریڈ کیا جائے گا۔ ایم ڈی پنجاب سیڈ کارپوریشن علی ارشد رانا نے ہدایات جاری کرتے ہوئے کہا کہ جو بھی آسائنمنٹس ذمہ لگائی جائیں اس کو مقررہ وقت پر مکمل کیا جائے۔