حج مساوات انسانی کا عظیم مظہرہے:شیخ الاسلام ڈاکٹرطاہرالقادری

تحریک منہاج القرآن کے بانی و سرپرست کی دنیا بھر کے حجاج کرام کو مبارکباد حج کا روحانی سفر انسان کو اپنے خالق سے جوڑ دیتا ہی:پیغام

جمعرات 5 جون 2025 22:34

حج مساوات انسانی کا عظیم مظہرہے:شیخ الاسلام ڈاکٹرطاہرالقادری

لاہور (اُردو پوائنٹ اخبارتازہ ترین - آن لائن۔ 05 جون2025ء) بانی و سرپرست اعلیٰ تحریک منہاج القرآن شیخ الاسلام ڈاکٹر محمد طاہرالقادری نے فریضہ حج کی ادائیگی کی سعادت حاصل کرنے والے لاکھوں حجاج کرام کو مبارکباد دیتے ہوئے کہا ہے کہ حج ایک ایسا روحانی سفر ہے جو انسان کو اس کے خالق سے جوڑ دیتا ہے، حج صرف جسمانی مشقت کا نام نہیں بلکہ دل و دماغ کی پاکیزگی، نیت کی درستگی اور عاجزی کا مظہر ہے۔

دنیا بھر سے لاکھوں مسلمان ایک ہی لباس میں’’لبیک‘‘ کی صدائوںکیساتھ سجدہ ریز ہوتے ہیں۔ حج اسلامی اخوت اور بھائی چارے کے فروغ کا ذریعہ ہے۔ شیخ الاسلام ڈاکٹر طاہر القادری نے کہاکہ آج ہمیں حج کے پیغام کو سمجھنے اور اپنی زندگی میں اپنانے کی اشد ضرورت ہے۔ فرقہ واریت، تعصب، نفرت اور تفریق کے تمام بتوں کو گرانا ہو گا۔

(جاری ہے)

انہوں نے کہاکہ حج کی ادائیگی ایک بہت بڑی سعادت ہے۔

حج کی سعادت حاصل کرنے والا گناہوں سے ایک معصوم بچے کی طرح پاک صاف ہو جاتا ہے اور اللہ تعالیٰ اخلاص کے ساتھ فریضہ حج ادا کرنے والے کی ہر دعا قبول کرتا ہے۔ حجاج کرام ملت اسلامیہ کے اتحاد و یکجہتی اور امن و خوشحالی کے لئے دعا کریں۔ انہوں نے اپنے پیغام میں کہا کہ حج اسلام کی بنیادی تعلیمات میں سے ایک ایسا رکن ہے جو اجتماعیت اور اتحاد و یگانگت کا آئینہ دار ہے۔ حج مساوات انسانی کا عظیم مظہر ہے۔ مناسک حج کی ادائیگی کرتے ہوئے کوئی گورا، کالا، امیر، غریب، چھوٹا، بڑا نہیں ہوتا، سب اللہ کے حضور عجز و انکساری کے ساتھ سربسجود ہوتے اور رحمت کے طلبگار بنتے ہیں۔ یہی فکر سوچ اور رویہ عملی زندگی کے ہر گوشے میں نظر آنا چاہئے۔