پی ٹی اے کا کال سینٹر کسٹمر سروس کارکردگی اشاریوں کاپہلی سہ ماہی 2025 ء کاجامع سروے کامیابی سے مکمل

منگل 3 جون 2025 20:50

اسلام آباد (اُردو پوائنٹ اخبارتازہ ترین - اے پی پی۔ 03 جون2025ء) پاکستان ٹیلی کمیونیکیشن اتھارٹی (پی ٹی اے) نے پاکستان کے تمام موبائل فون آپریٹروں کی پہلی سہ ماہی برائے سال 2025 کے کسٹمر سروس کارکردگی اشاریوں کا جامع سروے کامیابی سے مکمل کر لیا ہے۔منگل کو پی ٹی اے سے جاری کردہ بیان کے مطابق اس سروے میں کسٹمر کے رابطے کے اہم پہلوئوں کا جائزہ لیا گیا جن میں ہیلپ لائن تک رسائی، آپریٹر کے جواب کا وقت، شکایات کے حل کا دورانیہ، مسئلے کے حل کی کامیابی کی شرح اور ایمرجنسی سروسز تک رسائی شامل ہیں۔

یہ جائزہ ٹیلی کام کنزیومر پروٹیکشن (ایمنڈمنٹ) ریگولیشنز 2017 کے مطابق لیا گیا۔سروے کے نتائج میں انڈسٹری میں کچھ پہلوئوں کی تعمیل اور کچھ کی عدم تعمیل کا ملا جلا رجحان دیکھنے میں آیا۔

(جاری ہے)

قابل ذکر بات یہ ہے کہ کال سینٹر آپریٹرز تک رسائی کا وقت تمام سی ایم اوز میں مقررہ حد سے زیادہ رہا جس سے صارفین کے طویل انتظار کی عکاسی ہوتی ہے۔ نیز زونگ، ٹیلی نار ، یوفون، جاز اور ایس سی او میں سے کسی نے بھی بلنگ سے متعلق معطلی کے بعد کنکشن کی بحالی کے مکمل اعداد و شمار فراہم نہیں کیے۔

ایس سی او ایم کی جانب سے بلنگ اور شکایات کے تجزیہ کے لیے ڈیٹا جمع نہیں کروایا گیا۔ یوفون کے نیٹ ورک پر ایمرجنسی کالز میں مسائل پائے گئے جبکہ ایس سی او کے صارفین کو نیٹ ورک میپنگ کی حدود کی وجہ سے پی ٹی اے کی ٹول فری ہیلپ لائن (55055-0800) تک رسائی ممکن نہ ہو سکی۔پی ٹی اے کی جانب سے تمام آپریٹروں کو کہا گیا ہے کہ وہ ان خامیوں کو فوری طور پر دور کریں اور ایک ماہ کے اندر تعمیل کی رپورٹس جمع کرائیں۔