آئی جی اسلام آباد سید علی ناصر رضوی نے شہداء کے اہل خانہ کے ہمراہ عید منائی

ہفتہ 7 جون 2025 15:10

اسلام آباد (اُردو پوائنٹ اخبارتازہ ترین - اے پی پی۔ 07 جون2025ء) انسپکٹر جنرل آف پولیس (آئی جی پی) سید علی ناصر رضوی نے پولیس لائنز ہیڈ کوارٹرز میں پولیس شہداء کے اہل خانہ کے ساتھ عیدالاضحیٰ منائی، شہید ہونے والے ہیروز کے پیاروں کے ساتھ یکجہتی اور جذباتی حمایت کا اعادہ بھی کیا۔ ترجمان اسلام آباد پولیس کے مطابق پولیس لائنز ہیڈ کوارٹرز میں عید کا عظیم اجتماع منعقد ہوا جس میں سینئر افسران اور اہلکاروں نے ایک ساتھ نماز عید ادا کی۔

آئی جی سید علی ناصر رضوی نے افسروں اور اہلکاروں کو عید کی مبارکباد دی اور ان سے عید بھی ملے۔نماز عید کے بعد آئی جی نے یادگار شہداء پر حاضری دی، پھولوں کی چادر چڑھائی اور فرض کی ادائیگی میں جانوں کا نذرانہ پیش کرنے والے بہادروں کی یاد میں فاتحہ خوانی بھی کی۔

(جاری ہے)

اس موقع پر شہدا کے اہل خانہ اور پولیس افسران کے لیے خصوصی ظہرانے کا اہتمام کیا گیا ۔

اس دوران آئی جی سید علی ناصر رضوی شہداء کے بچوں کے ساتھ گھل مل گئے اور گرمجوشی سے گلے ملے۔آئی جی نے ان کی خیریت سے گہری جذباتی وابستگی کا اظہار کرتے ہوئے کہا کہ شہداء کے اہل خانہ میرا خاندان ہیں۔آئی جی اسلام آباد نے یقین دلایا کہ شہداء کے بچوں کو کبھی تنہا نہیں چھوڑا جائے گا، ان ہیروز کی قربانیوں نے قوم کو امن و سلامتی سے عید منانے کے قابل بنایا ہے۔