Live Updates

راولپنڈی میں عید الاضحیٰ پر خصوصی صفائی آپریشن بھرپور انداز میں جاری

پیر 9 جون 2025 11:40

راولپنڈی (اُردو پوائنٹ اخبارتازہ ترین - اے پی پی۔ 09 جون2025ء) راولپنڈی کنٹونمنٹ بورڈ کی جانب سے عید الاضحیٰ کے موقع پر خصوصی صفائی آپریشن بھرپور انداز میں جاری ہے جس کے تحت قربانی کے جانوروں کی آلائشوں کو بروقت اور محفوظ طریقے سے ٹھکانے لگایا جا رہا ہے۔ ترجمان کنٹونمنٹ بورڈ کے مطابق اب تک 650 ٹن سے زائد آلائشیں مختلف علاقوں سے اٹھا کر ٹرانسفر اسٹیشنز پر منتقل کی جا چکی ہیں۔

صفائی کے اس خصوصی آپریشن میں 700 سے زائد ورکرز فیلڈ میں موجود ہیں جو شب و روز ڈیوٹی سر انجام دے رہے ہیں۔ ڈپٹی چیف ایگزیکٹو آفیسر (ڈپٹی سی ای او) ناصر کمال نے بتایا کہ کنٹرول روم میں شکایات کے فوری ازالے کے لیے عملہ ہمہ وقت موجود ہے جہاں اب تک 173 سے زائد شکایات موصول ہوئی ہیں جن میں سے 164 شکایات حل کر لی گئی ہیں۔

(جاری ہے)

شکایات کو 30 منٹ کے اندر اندر حل کرنے کی کوشش کی جا رہی ہے تاکہ شہریوں کو کسی قسم کی پریشانی کا سامنا نہ کرنا پڑے۔

ناصر کمال کے مطابق 10 وارڈز کو مختلف حصوں میں تقسیم کر کے مربوط انداز میں صفائی کا عمل یقینی بنایا جا رہا ہے۔ اس کے علاوہ 110 ہیوی گاڑیاں بھی صفائی آپریشن کے لیے مختص کی گئی ہیں تاکہ آلائشوں کی بروقت ترسیل ممکن ہو سکے۔ کنٹونمنٹ بورڈ کے افسران نے کنٹرول روم اور مختلف علاقوں کا دورہ بھی کیا اور صفائی کی صورتحال کا جائزہ لیا۔ ڈپٹی سی ای او نے بتایا کہ گھروں، قربان گاہوں اور گلیوں سے آلائشوں کو مخصوص پوائنٹس سے اٹھا کر ٹرانسفر اسٹیشنز منتقل کیا جا رہا ہے جبکہ شاہراہوں اور گلیوں میں چونے کا چھڑکاؤ بھی جاری ہے تاکہ تعفن اور بیماریوں سے بچاؤ ممکن بنایا جا سکے۔

انہوں نے کہا کہ صفائی آپریشن عید کے تینوں دن جاری رہے گا اور اس دوران کسی قسم کی غفلت برداشت نہیں کی جائے گی۔ آخر میں شہریوں سے اپیل کی گئی ہے کہ آلائشوں کو گلیوں کے اندر نہ رکھیں بلکہ مختص کردہ پوائنٹس پر رکھیں تاکہ صفائی کا عمل موثر اور تیز تر ہو سکے۔ کنٹونمنٹ بورڈ کی جانب سے رہائشیوں کے بھرپور تعاون کی امید ظاہر کی گئی ہے تاکہ عید الاضحیٰ کے موقع پر صفائی ستھرائی کا بہترین ماحول برقرار رکھا جا سکے۔