ٹک ٹاک پہ چیلنج کرنے پر دو گروپوں میں تصادم، 4 افراد زخمی، ایک کی حالت نازک

بورے والا کے تھانہ گگو منڈی کی حدود میں دو گروپوں کے تصادم میں ڈنڈوں اور اسلحہ کا آزادانہ استعمال کیا گیا

ساجد علی پیر 9 جون 2025 14:21

ٹک ٹاک پہ چیلنج کرنے پر دو گروپوں میں تصادم، 4 افراد زخمی، ایک کی حالت ..

بورے والا ( اُردو پوائنٹ اخبارتازہ ترین۔ 09 جون 2025ء ) سوشل میڈیا ایپ ٹک ٹاک پہ چیلنج کرنے پر دو گروپوں میں تصادم ہوگیا جس کے نتیجے میں 4 افراد زخمی ہوگئے جن میں ایک کی حالت نازک بتائی گئی ہے۔ تفصیلات کے مطابق صوبہ پنجاب کے علاقہ بورے والا کے تھانہ گگو منڈی کی حدود 175 ای بی میں دو گروپوں میں تصادم ہوگیا اس دوران فائرنگ اور ڈنڈوں کے استعمال سے چار افراد زخمی ہو گئے، پولیس نے بتایا کہ تھانہ گگو کے نواحی گاؤں 175 ای بی میں بھٹی اور شیخ چوہان گروپ کے مابین ٹک ٹاک پر ویڈیوز لگا کر ایک دوسرے کو چیلنج دینے کا تنازعہ چل رہا تھا جس پر دونوں گروپوں کے مابین ڈنڈوں اور اسلحہ کا آزادانہ استعمال ہوا۔

اس حوالے سے پولیس کا مزید کہنا ہے کہ اس تصادم کے نتیجے میں شیخ چوہان گروپ کے 4 افراد علی حسن، وسیم عرف بگھی، شہباز خورشید اور اس کے والد خورشید شدید زخمی ہو گئے، زخمیوں کو تحصیل ہسپتال منتقل کردیا گیا جن میں سے ایک کی حالت نازک بتائی جا رہی ہے، پولیس تھانہ گگو منڈی نے موقع پر پہنچ کرکارروائی شروع کردی۔

(جاری ہے)

دوسری طرف نیشنل سائبر ایمرجنسی رسپانس ٹیم نے ٹک ٹاکر ثنا یوسف کے قتل کے تناظر میں ٹاکرز اور انفلوئنسرز کیلئے ایڈوائزری جاری کردی، جس میں ٹاک ٹاکرز، وی لاگرز، انفلوئنسرز اور بلاگرز سے کہا گیا ہے کہ وہ محتاط رہیں لائیو سٹریمنگ کی لوکیشن ظاہر نہ کریں، سوشل میڈیا پر ہر کسی کو دوست نہ بنائیں اور ہر کسی کے بلانے پر ملاقات یا کام کے سلسلے میں جانے سے گریز کریں اور حقیقی دنیا میں بھی محتاط رہیں۔

ادارے کا ایڈوائزری میں کہنا ہے کہ تخلیق کار اپنی ڈیجیٹل موجودگی محفوظ، مثبت اور ذمہ دارانہ انداز میں برقرار رکھیں، ذاتی اور ڈیجیٹل تحفظ یقینی بنانے کے لیے نیشنل سرٹ کی ہدایات پر عمل کریں، شناخت اور خیالات کے باعث آپ کو آن لائن اور حقیقی دنیا میں خطرات ہوسکتے ہیں، ڈیپ فیک ٹیکنالوجی کے ذریعے آپ کی جعلی آڈیو یا ویڈیو آئے تو فوری تردید کریں، سوشل میڈیا اکاونٹس پر ملٹی فیکٹر تصدیق اور مضبوط پاس ورڈز لگائیں۔

نیشنل سائبر ایمرجنسی رسپانس ٹیم نے کہا ہے کہ سوشل میڈیا اکاونٹس کی پرائیویسی سیٹنگز کریں، مشکوک لنک نہ کھولیں، انفلوئنسرز لائیو اسٹریمز یا پوسٹس میں اپنی موجودہ لوکیشن ظاہر کرنے سے گریز کریں، سوشل میڈیا پر ہر شخص کو دوست بنانے سے گریز کریں، اپنے پلیٹ فارم پر آنے والے تبصروں اور پیغامات کی باقاعدہ نگرانی کریں، غیر اخلاقی یا نامناسب تبصرے فوری بلاک اور متعلقہ پلیٹ فارمز پر رپورٹ کریں۔