gروس نے یوکرین پر ایک رات میں ریکارڈ 479 ڈرون حملے کیے

پیر 9 جون 2025 19:15

کیف (اُردو پوائنٹ اخبارتازہ ترین - آن لائن۔ 09 جون2025ء)یوکرینی فضائیہ نے بتایا ہے کہ روس نے یوکرین پر فضائی حملے کے دوران ایک رات میں ریکارڈ 479 ڈرون فائر کیے۔غیر ملکی خبررساں ادارے رائٹرز کے مطابق کیف کی فضائیہ نے کہا ہے کہ یہ حملہ ایسے وقت میں کیا گیا ہے جب ماسکو جنگ بندی کی اپیلوں کو مسترد کررہا ہے اور یہ حملہ ایک بڑے پیمانے پر کیا گیا ہے۔

روسی ڈرون حملوں کے نتیجے میں یوکرین کے کئی علاقوں کو نقصان پہنچا تاہم، اس حملے کے نتیجے میں کسی جانی نقصان یا پھر بڑے پیمانے پر ہلاکتوں کی اطلاعات موصول نہیں ہوئیں۔یوکرینی فضائیہ کے مطابق روس نے 10 مقامات پر فضائی حملے کیے جب کہ یوکرین کے مغربی شہر روِنے کے میئر اولیگزینڈر تریتیاک نے اسے جنگ کے آغاز کے بعد علاقے پر سب سے بڑا حملہ قرار دیا۔

(جاری ہے)

روس نے حالیہ ہفتوں میں یوکرین بھر میں اپنے حملوں میں شدت پیدا کی ہے، جس کے بارے میں کیف کا کہنا ہے کہ یہ اس بات کا ثبوت ہے کہ ماسکو اپنی 3 سالہ طویل جارحیت کو روکنے کا کوئی ارادہ نہیں رکھتا اور امن مذاکرات کو سنجیدگی سے نہیں لے رہا۔ان حملوں نے یوکرین کے پہلے سے ہی دبا کا شکار فضائی دفاعی نظام کی صلاحیت سے متعلق خدشات پیدا کیے ہیں۔تاہم یوکرینی فضائیہ نے دعوی کیا ہے کہ اس نے 460 ڈرونز کو مار گرایا یا روک دیا جب کہ روس کی جانب سے رات بھر داغے گئے 20 میں سے 19 میزائلوں کو بھی ناکام بنایا۔