ورلڈ ٹیسٹ چیمپئن شپ فائنل: لنگی نگیدی تاریخ رقم کرنے کیلئے پر عزم

کامیابی جنوبی افریقی کرکٹ کو نئی راہ دکھا سکتی ہے، افریقی فاسٹ بولر کی گفتگو

منگل 10 جون 2025 20:24

لندن(اُردو پوائنٹ اخبارتازہ ترین - این این آئی۔ 10 جون2025ء)جنوبی افریقہ کے فاسٹ بولر لنگی نگیدی نے آسٹریلیا کے خلاف آئی سی سی ورلڈ ٹیسٹ چیمپئن شپ کے فائنل میں شاندار کارکردگی دکھانے کے عزم کا اظہار کیا ہے۔آئی سی سی ڈیجیٹل سے گفتگو میں 29 سالہ لنگی نگیدی نے کہا کہ یہ موقع ان کے کیریئر اور جنوبی افریقی ٹیسٹ کرکٹ کے لیے فیصلہ کن ثابت ہو سکتا ہے، اگر ہم یہ ٹائٹل جیت لیں تو یہ سرخ گیند والی کرکٹ کی طرف دوبارہ توجہ مبذول کرا سکتا ہے۔

انہوں نے کہا کہ میں الفاظ میں بیان نہیں کر سکتا کہ یہ موقع ہمارے لیے کتنا اہم ہے۔ گزشتہ چند برسوں میں ہم کئی بار کامیابی کے قریب پہنچے مگر کامیاب نہ ہو سکے، اب یہ خواب سچ ہونے کے قریب ہے۔لارڈز اسٹیڈیم میں کھیلنے کا سابقہ تجربہ رکھنے والے نگیدی نے کہا کہ اس بار دباؤ میں توازن ہے اور تیاری بھی مکمل ہے، میں خود کو بہت پراعتماد محسوس کر رہا ہوں۔

(جاری ہے)

ورلڈ ٹیسٹ چیمپئن شپ 2023-25 کا فائنل کا (آج)11 جون سے لندن کے تاریخی لارڈز کرکٹ گراؤنڈ میں کھیلا جائے گا، جہاں جنوبی افریقہ کا مقابلہ دفاعی چیمپئن آسٹریلیا سے ہوگا۔اس وقت جنوبی افریقہ پوائنٹس ٹیبل پر سرفہرست ہے۔ انہوں نے 12 میں سے 8 ٹیسٹ میچز جیتے ہیں،آسٹریلیا دوسرے نمبر پر ہے، جنہوں نے 19 میچوں میں سے 13 میں کامیابی حاصل کی۔