Live Updates

فنانس بل میں ٹیکس مہر یا بار کوڈ کے بغیر اشیا ضبط کرنے کا اعلان

منگل 10 جون 2025 22:20

اسلام آباد (اُردو پوائنٹ اخبارتازہ ترین - این این آئی۔ 10 جون2025ء)حکومت نے ٹیکس کی مہر یا بار کوڈ کے بغیر اشیا ضبط کرنے کا اعلان کردیا ۔فنانس بل کے مطابق پیٹرولیم لیوی آرڈیننس میں کاربن لیوی لفظ کا اضافہ کردیا جائے گا، یہ کاربن لیوی پیٹرولیم لیوی کے علاوہ ہوگی جو وفاقی حکومت نوٹیفائی کرتی رہے گی۔بل کے مطابق مالی سال 26-2025 کیلیے موٹر اسپرٹ اور ہائی اسپیڈ ڈیزل پر ڈھائی روپے کاربن لیوی عائد کی جائے گی، یہ کاربن لیوی بڑھاکر 5 روپے کردی جائے گی۔

فنانس بل کے مطابق فرنس آئل پر مالی سال26-2025 میں ڈھائی روپے کاربن لیوی عائد کی جائیگی جبکہ آئندہ مالی سال 10فیصد کی شرح سے ٹیکس عائد کرنے کی تجویز ہے۔بل کے مطابق ٹیکس کی مہر یا بارکوڈ کے بغیر اشیا ضبط کی جائیں گی، ٹیکس قوانین پر عمل درآمد کیلیے صوبائی افسران کی مدد لینے کا فیصلہ کیا گیا۔

(جاری ہے)

فنانس بل کے مطابق صوبائی افسران کی مدد سے نان ڈیوٹی پیڈ سگریٹ کی اسمگلنگ پر قابو پایا جاسکے گا، نئے بجٹ میں حکومت نے کسٹمز اصلاحات متعارف کرانے کا فیصلہ ہے۔

بل کے مطابق گردشی قرضوں کی ادائیگی کیلئی10فیصد سرچارج عائد کرنے کا فیصلہ کیا گیا جبکہ حکومت کو سرچارج ریٹ بڑھانے کا اختیار حاصل ہوگا۔فنانس بل کے مطابق نئے بجٹ میں انرجی وہیکل پالیسی پر عمل درآمد کیلیے اہم اقدامات کا اعلان کیا گیا اور کہا گیا کہ پیٹرول اور ڈیزل کے بجائے الیکٹرک گاڑیوں کو ترجیح دی جائے گی۔بل کے مطابق الیکٹرک موٹرسائیکل اور رکشوں کے استعمال کو فروغ دیا جائے گا، تیل استعمال کرنے والی گاڑیوں کی فروخت اور درآمد پر انجن کپیسٹی کے مطابق لیوی عائد کی جائے گی۔فنانس بل کے مطابق فاٹا اور پاٹا کیلئے ٹیکس چھوٹ کا خاتمہ کردیا گیا ہے ، ان علاقوں میں بننے والی اشیا پر مرحلہ وار سیلز ٹیکس نافذ کیا جائے گا ۔