نوویک جوکووچ سے علیحدگی کے بعد اینڈی مرے کوچنگ کے لئے تیار

بدھ 11 جون 2025 15:47

لندن (اُردو پوائنٹ اخبارتازہ ترین - اے پی پی۔ 11 جون2025ء) انگلینڈ کے شہرت یافتہ ٹینس سٹار اینڈی مرے نے سربین شہرہ آفاق ٹینس سٹار نوویک جوکووچ کے ساتھ کوچنگ شراکت سے صرف چھ ماہ بعد علیحدہ ہوگئے اور وہ اب دوبارہ کوچنگ کے لئے تیار ہیں۔ 38 سالہ اینڈی مرے نے برطانوی خبر رساں ادارے بی بی سی سے بات چیت کرتے ہوئے کہا کہ میں نے تاحال کوچنگ کے شعبے کو مسترد نہیں کیا ہے۔

3مینز سنگلز گرینڈ سلام ٹائٹل کے فاتح برطانوی ٹینس اینڈی مرے 2024 کے پیرس اولمپکس کے بعد گزشتہ موسم گرما میں ریٹائر ہو گئے تھے۔

(جاری ہے)

اینڈی مرے نے دوسرے ٹورنامنٹس کے علاوہ رواں سال کے پہلے گرینڈ سلام آسٹریلین اوپن ٹینس ٹورنامنٹ میں سربین ٹینس سٹار نوویک جوکووچ کے لئے کوچنگ کے شعبے میں کام کیا تھا۔اینڈی مرے نے کہا کہ میں دوبارہ کوچنگ شروع کروں گا اور مجھے نہیں لگتا کہ ایسا فوری طور پر ہوگا۔

انہوں نے کہا کہ میں ٹینس کھیل سے ریٹائرمنٹ کے بعد کوچنگ میں جانے کا ارادہ نہیں کر رہا تھا لیکن یہ ایک بہت ہی منفرد موقع تھا۔ انہوں نے کہا کہ یہ اب تک کے بہترین کھلاڑیوں سے سیکھنے کا موقع تھا۔ ایندی مرے ٹینس سے ریٹائر ہونے کے بعد سے ٹینس کورٹ کے مقابلے گالف کورس میں زیادہ وقت گزار رہے ہیں۔