تاریخی بلند ترین رجسٹریشن ،مئی 2025ء میں 3,609 کمپنیوں کی رجسٹریشن کی گئی،ایس ای سی پی

اسلام آباد (اُردو پوائنٹ اخبارتازہ ترین - اے پی پی۔ 11 جون2025ء) سکیورٹیز اینڈ ایکسچینج کمیشن آف پاکستان (ایس ای سی پی) نے مئی 2025ء میں 3,609 کمپنیوں کی تاریخی بلند ترین رجسٹریشن کی ہے جو جنوری 2025ء میں قائم کردہ 3,442 کے پچھلے ریکارڈ کو پیچھے چھوڑ گئی ہے۔ اس دوران 2.7 ارب روپے سے زائد کا سرمایہ اکٹھا کیا گیا جبکہ تقریباً 99.9 فیصد نئی کمپنیوں کی رجسٹریشن اب ڈیجیٹل طریقے سے کی جا رہی ہے۔

یہ بڑھتا ہوا رجحان سرمایہ کاروں کے بڑھتے ہوئے اعتماد اور ایس ای سی پی کی ڈیجیٹل اصلاحات کی کامیابی کو ظاہر کرتا ہے جن کا مقصد کاروبار کی رجسٹریشن کو آسان بنانا اور انٹرپرینیورشپ کو فروغ دینا ہے۔ ایس ای سی پی اپنے ریگولیٹری فریم ورک کو مضبوط بنا کر، شفافیت کو بہتر بنا کر اور پاکستان بھر میں ایک جامع، سرمایہ کار دوست کارپوریٹ ماحول کو فروغ دے کر کاروبار کرنے میں آسانی کو بڑھانے کے لیے پرعزم ہے۔

(جاری ہے)

اس اضافے سے ملک میں رجسٹرڈ کمپنیوں کی کل تعداد 255,000 سے تجاوز کر گئی ہے۔پرائیویٹ لمیٹڈ کمپنیاں کل رجسٹریشن کا 59 فیصد تھیں جبکہ سنگل ممبر کمپنیاں 37 فیصد تھیں۔ بقیہ 4 فیصد میں پبلک ان لسٹڈ کمپنیاں، ناٹ فار پرافٹ آرگنائزیشنز، گارنٹی لمیٹڈ کمپنیاں اور لمیٹڈ لائبلٹی پارٹنرشپس (ایل ایل پیز) شامل تھیں۔ شعبہ جاتی ترقی پر گہری نظر ڈالنے سے متعدد صنعتوں میں مضبوط سرگرمی کا پتہ چلتا ہے۔

انفارمیشن ٹیکنالوجی (آئی ٹی) اور ای کامرس کے شعبوں میں سب سے زیادہ اضافہ دیکھا گیا جہاں 718 نئی کمپنیاں شامل ہوئیں۔ ٹریڈنگ سیکٹر میں 506 نئی کمپنیاں شامل ہوئیں جبکہ سروسز میں 447 نئی کمپنیاں رجسٹر ہوئیں۔ رئیل اسٹیٹ ڈویلپمنٹ اور کنسٹرکشن میں 342 نئی کمپنیاں رجسٹر ہوئیں، اس کے بعد سیاحت اور ٹرانسپورٹ میں 237، فوڈ اینڈ بیوریجز میں 187 اور تعلیم میں 160 کمپنیاں شامل ہوئیں۔

دیگر نمایاں شعبوں میں مائننگ اینڈ کوارینگ (89)، فارماسیوٹیکل (78)، ٹیکسٹائل (74)، مارکیٹنگ اینڈ ایڈورٹائزمنٹ (72)، کاسمیٹکس اینڈ ٹوائلٹریز (67)، انجینئرنگ (62) اور ہیلتھ کیئر (51) شامل تھے۔ اضافی شعبوں جنہوں نے اس ترقی میں حصہ لیا، جیسے کیمیکل، ٹرانسپورٹ، کارپوریٹ ایگریکلچرل فارمنگ، فیول اینڈ انرجی، سیکشن 42، آٹو اینڈ الائیڈ، پاور جنریشن اور سپورٹس اینڈ الائیڈنے مجموعی طور پر 519 نئی کمپنیاں شامل کیں۔

مارکیٹ تک رسائی اور مالی شمولیت کو بڑھانے کی اپنی کوششوں کے مطابق ایس ای سی پی نے متعدد ریگولیٹری ڈومینز میں 56 لائسنس جاری کیے۔ ان میں کیپٹل مارکیٹس میں تین، انشورنس سیکٹر میں ایک، نان بینکنگ فنانشل سروسز میں تین اور کمپنیز ایکٹ 2017 کے سیکشن 42 کے تحت این جی اوز کو 49 لائسنس شامل تھے۔ پاکستان کے کارپوریٹ سیکٹر میں غیر ملکی سرمایہ کاری نے بھی حوصلہ افزاء ترقی دکھائی، جہاں 98 نئی کمپنیوں کو بین الاقوامی سرمایہ کاروں سے سرمایہ حاصل ہوا۔