ملکی دریاؤں میں پانی کا اتار چڑھاؤ،آبی ذخائر میں پانی کی سطح میں مسلسل کمی‘ ایک ہفتے میں پانی کی سطح 9 لاکھ ایکڑ فٹ سے زائد گر گئی

جمعرات 12 جون 2025 18:49

اسلام آباد(اُردو پوائنٹ اخبارتازہ ترین - آن لائن۔ 12 جون2025ء)ملکی دریاؤں میں پانی کا اتار چڑھاؤ،آبی زخائر میں پانی کی سطح میں مسلسل کمی آرہی ہے اورآبی ذخائر میں ایک ہفتے میں پانی کی سطح 9 لاکھ ایکڑ فٹ سے زائد گر گئی ۔ترجمان واپڈاکے مطابق تین بڑے پانی کے ڈیمز میں پانی کا مجموعی زخیرہ 33 لاکھ 45 ہزار ایکڑ فٹ کی سطح پر آگیا ۔گزشتہ ہفتے تینوں ڈیمز میں پانی کے مجموعی ذخائر 42 لاکھ 5 ہزار ایکڑ فٹ تھے۔

دریائے سندھ میں پانی کے بہاؤ میں ایک ہفتے کے دوران 29 ہزار کیوسک سے زائد کی کمی ہوئی۔دریائے سندھ میں تربیلا کے مقام پر آج پانی کی آمد 52 ہزار 4 سو کیوسک ریکارڈ ‘دریائے سندھ میں گزشتہ ہفتے پانی کی آمد 81 ہزار کیوسک سے زائد تھی۔واپڈا حکام کے مطابق دریائے چناب میں روزانہ کی بنیاد پر پانی کا اتار چڑھاؤ جاری ہے،دریائے چناب میں ہیڈ مرالہ کے مقام پر آج پانی کی آمد 57 ہزار 4 سو کیوسک ریکارڈ کی گئی ۔

(جاری ہے)

ہیڈ مرالہ کے مقام پر دریائے چناب میں گزشتہ ہفتے پانی کی آمد 25 ہزار کیوسک تھی۔منگلا کے مقام پر دریائے جہلم میں پانی کی آمد 37 ہزار کیوسک سے زائد ریکارڈ کی گئی ۔منگلا کے مقام پر دریائے جہلم میں گزشتہ ہفتے پانی کی آمد 34 ہزار کیوسک تھی۔واپڈا حکام کے مطابق تربیلا ڈیم میں پانی کا مجموعی زخیرہ 9 لاکھ 3 ہزار ایکڑ فٹ کی سطح پر ہے،منگلا ڈیم میں آج پانی کا مجموعی زخیرہ 23 لکھا ایکڑ فٹ سے زائد ہے،چشمہ میں آج پانی کا مجموعی زخیرہ ایک لاکھ ایکڑ فٹ سے زائد ہے،تینوں ڈیمز میں پانی کے ذخائر میں گزشتہ ہفتے کی نسبت کمی ہوئی،مون سون بارشوں سے قبل آبی ذخائر میں پانی کی صورتحال میں بہتری کا کوئی امکان نہیں،مون سون بارشوں سے دریاؤں اور آبی ذخائر میں پانی کے بہاؤ اور زخائر میں اضافہ متوقع ہے۔