راجستھان ، ہندو توا غنڈوں کا دلت خاتون سرپنچ ،اسکے شوہر پر بہیمانہ تشدد

جمعہ 13 جون 2025 13:21

جے پور (اُردو پوائنٹ اخبارتازہ ترین - اے پی پی۔ 13 جون2025ء) بھارتی ریاست راجستھان کے ضلع ڈیڈوانہ میں ہندو توا غنڈوں نے ایک دلت خاتون سرپنچ اور اسکے شوہر کو اس وقت بہیمانہ تشدد کا نشانہ بنایا جب وہ ایک سڑک کی تعمیر کی نگرانی کر رہے تھے۔کشمیر میڈیاسروس کے مطابق یہ واقعہ ضلع کے گاﺅں کھریش میں 8 جون کو پیش آیا ۔ غنڈوں نے دلت خاتون سرپنچ اور اس کے شوہر پر کلہاڑی سے حملہ کیا ۔

حملہ آوروں کے سرغنہ بھنور سنگھ نے دلت جوڑے کو ذات پانے کے طعنے دیے اور دونوں پر کلہاڑی سے حملہ کیا ۔ واقعے کی ایک ویڈیو بھی وائرل ہوئی ہے جس میں سنگھ کو میاں بیوی پر کلہاڑی سے حملہ کرتے ہوئے دیکھا جاسکتا ہے، کچھ خواتین کو سنگھ کو روکنے اور اسکے ہاتھ سے کلہاڑی چھیننے کی کوشش کرتے ہوئے بھی دیکھا جاسکتا ہے۔

(جاری ہے)

سنگھ نے دعویٰ کیا ہے کہ یہ سڑک اسکی زمین پر قبضہ کر کے بنائی جا رہی ہے۔

پولیس نے معاملے کے حوالے سے مقدمہ درج کر لیا ہے ،بھنور سنگھ فی الحال مفرور ہے۔ ضلع ڈڈوانہ کے ایس پی ہنومان پرساد کا کہنا ہے کہ یہ اصل میں زمین کا تنازعہ ہے، ملزم بھنور سنگھ کے گھر کے قریب سڑک بن رہی ہے، اس کا کہنا ہے کہ اس کی زمین پر قبضہ کیا جا رہا ہے۔اس حملے نے سوشل میڈیا پر غم و غصے کو جنم دیاہے۔ صارفین نے راجستھان میں امن و امان کی بگڑتی ہوئی صورتحال پر سخت تشویش کا اظہار کیا۔